გლობალურმა ბაზრებმა ოთხთვიანი დაძაბულობის შემდეგ შვებით ამოისუნთქეს. აშშ-სა და ირანს შორის მიღწეულმა წინასწარმა სამშვიდობო შეთანხმებამ, რომელიც ჰორმუზის სრუტის გახსნასა და საზღვაო ბლოკადის მოხსნას ითვალისწინებს, ნავთობის ფასების ვარდნა გამოიწვია.

ენერგეტიკულ ბაზრებზე რეაქცია მყისიერი იყო. აშშ-ის ნავთობის ფიუჩერსები ივლისის მიწოდებისთვის 4.77%-ით, 80.83 დოლარამდე შემცირდა. საერთაშორისო ბენჩმარკი, Brent-ის ტიპის ნავთობი კი დაახლოებით 4%-ით გაიაფდა და 83.77 დოლარი შეადგინა.

აზიური ბაზრების პოზიტიური დინამიკა

საფონდო ინდექსებმა რეგიონში მკვეთრი ზრდა აჩვენეს. სამხრეთ კორეის Kospi 5.1%-ით დაწინაურდა, იაპონური Nikkei 225 3.6%-ით, ხოლო Topix-ი 2.6%-ით გაიზარდა. ავსტრალიური S&P/ASX 200-იც 1.3%-იანი მატებით დაიხურა.

„ბაზრები ამ ამბავს თვეების განმავლობაში ელოდნენ. ნავთობის ფასების კლება და რისკიანი აქტივების გააქტიურება აშკარა ნიშანია იმისა, რომ გეოპოლიტიკური რისკ-პრემია მცირდება“, — აცხადებს eToro-ს ანალიტიკოსი ჯოშ გილბერტი.

ფინანსურმა ბაზრებმა პოზიტიურად შეაფასეს აშშ-ის დოლარის ინდექსის 0.32%-იანი კლებაც, რაც ინვესტორების მიერ ინფლაციური მოლოდინების გადაფასებაზე მიუთითებს. 10-წლიანი სახაზინო ვალდებულებების შემოსავლიანობაც 5 საბაზისო პუნქტით, 4.423%-მდე დაეცა.

სკეპტიციზმი და რისკები

მიუხედავად ბაზრის ოპტიმიზმისა, ინვესტორების ნაწილი სიფრთხილეს იჩენს. მთავარი მიზეზი ისაა, რომ შეთანხმება ჯერ კიდევ არ არის ხელმოწერილი. გილბერტის თქმით, დოკუმენტის საბოლოო გაფორმება 19 ივნისისთვის იგეგმება, მანამდე კი სიტუაცია შესაძლოა ნებისმიერ დროს შეიცვალოს.

საინტერესოა ოქროს ფასის დინამიკაც. მიუხედავად ზოგადი „რისკიანი“ განწყობისა, ოქრო კვლავ ძვირდება და უნციაზე 4300 დოლარის ნიშნულს ინარჩუნებს. ანალიტიკოსების აზრით, ეს იმის მანიშნებელია, რომ ბაზარი ჯერ კიდევ არ ენდობა შეთანხმების საბოლოო რეალიზებას.

Commonwealth Bank of Australia-ს ექსპერტები ვარაუდობენ, რომ Brent-ის ფასი წლის ბოლომდე შესაძლოა 80 დოლარის ფარგლებში დასტაბილურდეს, თუკი ნავთობის ექსპორტი და საზღვაო მიმოსვლა შეუფერხებლად აღდგება. თუმცა, ინფრასტრუქტურის დაზიანება და საზღვაო ნაღმების საფრთხე რჩება ფაქტორებად, რომლებმაც შესაძლოა პროცესი შეაფერხოს.