„ნაციონალური მოძრაობის“ წევრი ანა წითლიძე პარტია „ახალის“ ერთ-ერთი ლიდერის, ნიკა მელიას მიერ ციხიდან გავრცელებულ წერილს ეხმაურება. წითლიძის თქმით, გაუგებარია მელიას მხრიდან პარტიის მიმართ გამოთქმული პრეტენზიები, რადგან იმ პერიოდში, რომელზეც მელია საუბრობს, თავად იყო „ნაციონალური მოძრაობის“ თავმჯდომარე.
წითლიძე „ტვ პირველის“ ეთერში აცხადებს, რომ 2021 წელს პარტიის პოლიტიკურ დღის წესრიგს და მთავარ სტრატეგიას სწორედ ნიკა მელია და პარტიის მაშინდელი მთავარი იდეოლოგი, ნიკა გვარამია განსაზღვრავდნენ.
ვინ იღებდა გადაწყვეტილებებს?
„მაინტერესებს, იმ წლებში, რომლებსაც ნიკა მელია ასახელებს, მთავარი გადაწყვეტილების მიმღები ვინ იყვნენ? ეს იყო ნიკა მელია, როგორც პარტიის თავმჯდომარე, და ნიკა გვარამია, როგორც მთავარი იდეოლოგი,“ - განაცხადა წითლიძემ.
მისი თქმით, პარტიის რიგითი წევრები და თავად წითლიძეც კი, ბევრ მნიშვნელოვან ინფორმაციას ტელევიზიიდან იგებდნენ. „ძალიან დიდი ბოდიში და ვის აკისრებს მელია პასუხისმგებლობას? 2021 წელს ისინი იყვნენ მთავარი ფიგურები, მათ ჰქონდათ სრული ინფორმაცია, ჩვენ კი მხოლოდ ფაქტის დადგომის შემდეგ ვიგებდით ამბებს,“ - აღნიშნა მან.
სააკაშვილისა და „ქართული ოცნების“ სავარაუდო გარიგება
ანა წითლიძე განსაკუთრებულ ყურადღებას ამახვილებს მელიას განცხადებაზე, რომელიც მიხეილ სააკაშვილისა და „ქართული ოცნების“ სავარაუდო გარიგებას ეხება. წითლიძე კითხვის ნიშნის ქვეშ აყენებს მელიას მოტივაციას.
„თუ 2021 წელს მან გაიგო, რომ სააკაშვილი „ქოცებთან“ შეკრული იყო, რამ მოათმენინა, რომ ეს ინფორმაცია საზოგადოებისთვის არ გაეზიარებინა? რამ მოათმენინა, რა შუაშია აქ მიშას ციხეში ყოფნა? თუ მართლა იცოდა რამე, რატომ დუმდა მანამ, სანამ პარტიიდან არ გააგდეს?“ - აცხადებს წითლიძე.
მისივე თქმით, მელიას ეს პოზიცია შეუსაბამოა და ემსახურება მხოლოდ პოლიტიკური პასუხისმგებლობის სხვაზე გადატანას, მაშინ როდესაც თავად იყო პარტიის მმართველი რგოლის სათავეში.
დისკუსია
0 კომენტარი
ჯერ კომენტარი არ არის — იყავი პირველი.