რუსთავი-თბილისის დამაკავშირებელ მაგისტრალზე მძიმე ავტოსაგზაო შემთხვევა მოხდა. ინციდენტი 6 ივნისს დილით დაფიქსირდა, რა დროსაც ერთმანეთს რამდენიმე სატრანსპორტო საშუალება შეეჯახა, მათ შორის სასკოლო მიკროავტობუსი.

წინასწარი მონაცემებით, შემთხვევა „მერსედესის“ მარკის ავტომობილის მაღალი სიჩქარით მოძრაობამ გამოიწვია. მძღოლმა წინ მიმავალ სამარშრუტო ტაქსს შეეჯახა, რის შემდეგაც დარტყმის ძალამ მარშრუტკა იმ მიკროავტობუსს დააჯახა, რომელსაც გარდაბნის მუნიციპალიტეტის სოფელ ქესალოს საჯარო სკოლის მოსწავლეები გადაჰყავდა.

ავარიის შედეგად შემთხვევის ადგილზე ერთი ადამიანი — ერთ-ერთი მიკროავტობუსის მძღოლი გარდაიცვალა. დაშავებულთა შორის არიან მოსწავლეებიც. გავრცელებული ინფორმაციით, მიკროავტობუსში სულ 17 მოსწავლე იმყოფებოდა. მათ მიიღეს მსუბუქი დაზიანებები, თუმცა უსაფრთხოების მიზნით, ბავშვები დაუყოვნებლივ გადაიყვანეს სამედიცინო დაწესებულებებში შესაბამისი გამოკვლევებისა და დახმარების მისაღებად.

ამ დროისთვის შემთხვევის ადგილზე საგამოძიებო მოქმედებები მიმდინარეობს, რათა დადგინდეს ავარიის გამომწვევი ზუსტი გარემოებები. შინაგან საქმეთა სამინისტრომ მომხდარზე გამოძიება დაიწყო.

3 ფოტო — დააჭირე გასადიდებლად

საქმეს იძიებენ საქართველოს სისხლის სამართლის კოდექსის შესაბამისი მუხლით, რომელიც გულისხმობს ტრანსპორტის მოძრაობის უსაფრთხოების ან ექსპლუატაციის წესის დარღვევას, რასაც ადამიანის სიცოცხლის მოსპობა მოჰყვა.