ბირთვული და რადიაციული უსაფრთხოების სააგენტომ სტუდენტებისთვის სპეციალური გასვლითი ღონისძიება გამართა. ინიციატივის მიზანი მომავალ თაობაში დარგობრივი ცნობიერების ამაღლება და პრაქტიკული გამოცდილების გაზიარება იყო.

შეხვედრაში კავკასიის საერთაშორისო უნივერსიტეტის (CIU) სტუდენტები, პროფესორ-მასწავლებლები და ადმინისტრაციის წარმომადგენლები მონაწილეობდნენ. ახალგაზრდებმა უშუალოდ სააგენტოს ლაბორატორიაში მიიღეს ინფორმაცია იმ ტექნიკური აღჭურვილობის შესახებ, რომელსაც უწყება ყოველდღიურ საქმიანობაში იყენებს.

3 ფოტო — დააჭირე გასადიდებლად

ვიზიტის ფარგლებში, სტუდენტებმა ივანე ჯავახიშვილის სახელობის თბილისის სახელმწიფო უნივერსიტეტის წარმომადგენლებთან ერთად, მუხათგვერდის გამოყენებითი კვლევების ცენტრი დაათვალიერეს. ეს ობიექტი ქვეყნის მასშტაბით რადიაციული უსაფრთხოების მონიტორინგისა და კვლევისთვის ერთ-ერთ მნიშვნელოვან წერტილს წარმოადგენს.

ღონისძიება ინტერაქტიულ რეჟიმში წარიმართა. სტუდენტებს შესაძლებლობა ჰქონდათ, დარგის სპეციალისტებისთვის უშუალოდ დაესვათ კითხვები და მიეღოთ დეტალური პასუხები რადიაციული უსაფრთხოების პრინციპებზე, ლაბორატორიულ კვლევებსა და თანამედროვე ტექნოლოგიურ გამოწვევებზე.

სააგენტოს წარმომადგენლების განცხადებით, მსგავსი ფორმატის ღონისძიებები მომავალშიც გაგრძელდება. მსგავსი პრაქტიკული ვიზიტები სტუდენტებს აძლევს შანსს, თეორიული ცოდნა რეალურ სამუშაო გარემოსთან დააკავშირონ და გაეცნონ იმ სტანდარტებს, რაც ქვეყნის ბირთვულ და რადიაციულ უსაფრთხოებას უზრუნველყოფს.