გორში მომხდარმა ძალადობის ფაქტმა, სადაც პოლიციელები დაკავებულს ფიზიკურად გაუსწორდნენ, საზოგადოების მწვავე კრიტიკა გამოიწვია. მომხდარს ადვოკატი ბორის (ჩელე) ყურუა ეხმაურება და აცხადებს, რომ მხოლოდ დამნაშავეების დასჯა პრობლემას ვერ აღმოფხვრის.

სისტემური მენტალიტეტის კრიზისი

ყურუას შეფასებით, სამართალდამცავ უწყებაში ჩამოყალიბებული მენტალიტეტი გაცილებით ღრმა პრობლემაა, ვიდრე კონკრეტული ინციდენტი. ადვოკატის თქმით, პოლიციელთა ნაწილი სოციალურ ქსელებში — ტიკ-ტოკსა და ფეისბუქზე — იარაღითა და სამსახურებრივი ავტომობილებით „მარიაჟობს“, რაც მიუღებელი ქცევაა.

„ამ ადამიანებს დააკავებენ, რადგან ძალადობის ამსახველი ვიდეო გავრცელდა. იტყვიან, რომ სამართლებრივი სახელმწიფო ვართ, მაგრამ ეს პრობლემას არ მოაგვარებს. მთავარი აქ ის დამპალი სისტემაა, რომელიც ჩამოყალიბდა“, — აცხადებს ბორის ყურუა.

პოლიციელი, როგორც „უფროსი“

ადვოკატი ხაზს უსვამს მოქალაქეებთან კომუნიკაციის სტილსაც. მისი დაკვირვებით, პოლიციელების ტონი მოქალაქეებთან ხშირად არ შეესაბამება საზოგადოებრივი წესრიგის დამცველის სტატუსს. სამართალდამცველები მოქალაქეებს ესაუბრებიან არა როგორც უსაფრთხოების გარანტები, არამედ როგორც „უფროსები“.

ყურუა მიიჩნევს, რომ სანამ უწყებაში ძირეული რეფორმა არ განხორციელდება, მსგავსი შემთხვევები განმეორდება. მისი თქმით, 5 ან 10 პოლიციელის დაკავება სისტემურ ცვლილებებს ვერ მოიტანს, მიუხედავად იმისა, რომ უწყებაში პატიოსანი და პროფესიონალი კადრებიც მუშაობენ.

„სანამ ძირეული რეფორმა არ მოხდება, ამას არაფერი ეშველება“, — აცხადებს ადვოკატი.

ამჟამად გორში მომხდარ ინციდენტზე გამოძიება სამსახურებრივი უფლებამოსილების ძალადობით გადამეტების მუხლით მიმდინარეობს, რაც სამართალდამცავთა პასუხისმგებლობის საკითხს აყენებს.