გაერთიანებული სამეფოს ხელისუფლებამ ლა-მანშის სრუტეში რუსეთის „ჩრდილოვანი ფლოტის“ ნაწილად მიჩნეული ტანკერი Smyrtos-ი დააკავა. ბრიტანული მხარის ინფორმაციით, გემზე 24 მეზღვაური იმყოფება, მათ შორის საქართველოს სამი მოქალაქე.

საქართველოს საზღვაო ტრანსპორტის სააგენტოს განცხადებით, აღნიშნული ტანკერი არ ფიქსირდება არცერთი აღიარებული ქართული საკრუინგო კომპანიის ბაზაში. უწყება ხაზგასმით აღნიშნავს, რომ ქართველი მეზღვაურები ამ კონკრეტულ გემზე კანონით დადგენილი წესით არ დასაქმებულან.

„საქართველოს კანონმდებლობა საკრუინგო კომპანიებს ავალდებულებს, მკაცრად შეამოწმონ სანქციები. აკრძალულია მეზღვაურთა დასაქმება იმ გემებზე, რომლებიც გაეროს, ევროკავშირის, აშშ-ის ან დიდი ბრიტანეთის სანქციებს ექვემდებარებიან“, — აცხადებენ სააგენტოში.

რა მოხდა ლა-მანშის სრუტეში?

ბრიტანეთის დანაშაულთან ბრძოლის ეროვნულ სააგენტოზე დაყრდნობით, კამერუნის დროშით მცურავი ტანკერის დაკავების ოპერაცია 14 ივნისს განხორციელდა. სამხედროებმა 6-საათიანი ოპერაციის შედეგად აიყვანეს კონტროლი გემზე, რომელიც ამჟამად დორსეტის საგრაფოშია გაჩერებული.

BBC-ის მონაცემებით, Smyrtos-ი (ყოფილი Myrtos) 5 ივნისს რუსეთის პორტ უსტ-ლუგიდან გავიდა. გემი რუსული ნავთობის ტრანსპორტირებას ახორციელებდა, რის გამოც იგი „ჩრდილოვანი ფლოტის“ ნაწილად ითვლება.

სანქციები და „ჩრდილოვანი ფლოტი“

ტანკერი Smyrtos-ი 2025 წლის ივლისში დაწესებული სანქციების სამიზნე გახდა. მას შემდეგ გემს სახელი შეუცვალეს, თუმცა ეს არ აღმოჩნდა საკმარისი საერთაშორისო შეზღუდვების თავიდან ასაცილებლად.

დასავლური სახელმწიფოები ამჟამად 500-ზე მეტ ტანკერს აკონტროლებენ, რომლებიც რუსულ ნავთობს უკრაინაში მიმდინარე ომის გამო დაწესებული ემბარგოს გვერდის ავლით გადაზიდავენ. 2026 წლის მარტიდან ბრიტანეთის მთავრობამ სამხედროებს უფლება მისცა, ტერიტორიულ წყლებში სანქცირებულ გემებზე ასულიყვნენ.

საქართველოს საზღვაო ტრანსპორტის სააგენტო კიდევ ერთხელ ადასტურებს, რომ ქვეყანა ერთგულია საერთაშორისო სანქციების შესრულებისა და საზღვაო კანონმდებლობის პრინციპების მიმართ.