საქართველოს ოჯახების აბსოლუტურ უმრავლესობას ფინანსური რეზერვი არ აქვს, რომელიც მათ შემოსავლის დაკარგვის შემთხვევაში ერთი თვის განმავლობაში მაინც უზრუნველყოფდა. კავკასიის კვლევითი რესურსების ცენტრის (CRRC) ახალი კვლევის თანახმად, მოსახლეობის 77% ყოველთვიური ხარჯების დასაფარად საჭირო თანხას ვერ ინახავს.

მხოლოდ 23%-ია ისეთი მოქალაქე, რომელსაც გაუთვალისწინებელი შემთხვევისთვის მცირე ფინანსური ბალიში მაინც გააჩნია. ეს მონაცემები ნათლად ასახავს ქვეყანაში არსებულ სოციალურ-ეკონომიკურ მოწყვლადობას.

ოჯახების 73%-ისთვის ყოველთვიური შემოსავალი სრულად იხარჯება საბაზისო საჭიროებებზე. ეს მოიცავს კვებას, საცხოვრებლის ქირას, კომუნალურ გადასახადებსა და საბანკო კრედიტების მომსახურებას. ფინანსური თავისუფლების მქონე ოჯახების წილი კი, რომლებიც შემოსავლის ნახევარზე მეტს არასავალდებულო შენაძენებზე ხარჯავენ, მხოლოდ 27%-ს შეადგენს.

კვლევა აჩვენებს, რომ ფინანსური მდგრადობის მხრივ შედარებით უკეთეს მდგომარეობაში არიან ახალგაზრდები (18-დან 34 წლამდე), დასაქმებულები და ის ოჯახები, რომელთა თვიური შემოსავალი 2000 ლარს აღემატება.

ეკონომიკური მოლოდინები

საზოგადოებაში მაღალია ეკონომიკური გაურკვევლობის დონე. გამოკითხულთა მხოლოდ 23% ელოდება ეკონომიკური მდგომარეობის გაუმჯობესებას მომდევნო ერთი წლის განმავლობაში. ამდენივე რესპონდენტი სირთულეს განიცდის რაიმე სახის პროგნოზის გაკეთებისას.

გრძელვადიან პერსპექტივაში ოპტიმიზმის მაჩვენებელი კვლავ 23%-ზე რჩება, თუმცა გაურკვევლობის წილი 27%-ს აღწევს. ეს მონაცემები მიანიშნებს, რომ მოქალაქეების ნაწილი მომავალს სიფრთხილით უყურებს.

3 ფოტო — დააჭირე გასადიდებლად

CRRC-ის კვლევა Omnibus-ის პროექტის ფარგლებში ჩატარდა. ტელეფონით გამოიკითხა 1000-ზე მეტი რესპონდენტი მთელი საქართველოს მასშტაბით, ოკუპირებული ტერიტორიების გარდა. კვლევა ჩატარდა ქართულ, აზერბაიჯანულ, სომხურ და რუსულ ენებზე.