ევროპის ქვეყნებში დიუშენის სინდრომის სამკურნალო მედიკამენტი დღეისთვის არ არსებობს. ამის შესახებ პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარემ, ზაზა ლომინაძემ პარლამენტის პლენარულ სხდომაზე განაცხადა.
ლომინაძის თქმით, ეს რეალობა ჟენევაში, ჯანმრთელობის მსოფლიო ორგანიზაციის 79-ე ასამბლეის ფარგლებში გამართულ შეხვედრებზეც დადასტურდა. ქართულმა დელეგაციამ კონსულტაციები გამართა ბრიტანეთის, ირლანდიის, პოლონეთის, იტალიისა და საფრანგეთის ჯანდაცვის მინისტრებთან.
რა ხდება ევროპაში?
საქართველოს დელეგაციის წევრების განცხადებით, ევროპის ქვეყნები მსგავსი გამოწვევის წინაშე დგანან. იქაც, ისევე როგორც საქართველოში, ამჟამად მიმდინარეობს სხვადასხვა ფარმაცევტული პროდუქტის განხილვა და მათი ეფექტურობის შესწავლა.
„ეს ქვეყნები ზუსტად ისეთ მდგომარეობაში არიან, როგორშიც ჩვენ. ჩვენც ვიხილავთ მედიკამენტებს და ვაკვირდებით, რომელი ფარმაცევტული კომპანიის პროდუქტი იქნება ყველაზე ეფექტური ამ ბავშვებისთვის“, - აღნიშნა ზაზა ლომინაძემ.
პოლიტიკური სპეკულაციები და რეაქციები
ჯანდაცვის კომიტეტის თავმჯდომარემ ოპოზიციურ ფრაქცია „საქართველოსთვის“ წარმომადგენლებს მოუწოდა, თავი შეიკავონ ამ საკითხით პოლიტიკური სპეკულაციებისგან. ლომინაძის თქმით, თემა არის უკიდურესად სენსიტიური და არ უნდა იქცეს პოლიტიკური ქულების დაწერის ინსტრუმენტად.
„თქვენ გინდათ, პოლიტიკური ქულები დაიწეროთ დიუშენით დაავადებული ბავშვების ხარჯზე და ეს არ გამოვა. ეს ეხება ჩვენს ბავშვებს, რომლებსაც დახმარება სჭირდებათ“, - განაცხადა კომიტეტის თავმჯდომარემ.
ზაზა ლომინაძის განცხადებით, ხელისუფლება მუდმივ კონტაქტზეა პაციენტების მშობლებთან და ექიმებთან, რათა საუკეთესო სამედიცინო გადაწყვეტილებები იქნას მიღებული.
მან ასევე ხაზი გაუსვა ეკლესიის ჩართულობას, რომელმაც გამოთქვა მზადყოფნა, ხელისუფლებასთან ერთად მიიღოს მონაწილეობა არსებული პრობლემების გადაჭრის პროცესში. ლომინაძის განმარტებით, აღნიშნული სამუშაო პროცესი სრულიად გამჭვირვალეა და მიზნად ისახავს ბავშვებისთვის ოპტიმალური მკურნალობის შერჩევას.
დისკუსია
0 კომენტარი
ჯერ კომენტარი არ არის — იყავი პირველი.