საფრანგეთის პრეზიდენტი ემანუელ მაკრონი შეერთებულ შტატებსა და ირანს შორის მიღწეულ ახალ შეთანხმებას მნიშვნელოვან დიპლომატიურ წარმატებად აფასებს. მაკრონის განცხადებით, ეს შედეგი მრავალმხრივი პარტნიორული ძალისხმევის ნაყოფია.

საფრანგეთის ლიდერი მოუწოდებს ჩართულ მხარეებს, დროულად და სრულად აღასრულონ შეთანხმების დებულებები. პარიზის პოზიცია მკაფიოა: შეთანხმებამ უნდა უზრუნველყოს ჰორმუზის სრუტის დაუყოვნებელი და უპირობო გახსნა საერთაშორისო საზღვაო მიმოსვლისთვის.

3 ფოტო — დააჭირე გასადიდებლად

ამ მიზნით, გაერთიანებულ სამეფოსთან ერთად უკვე შექმნილია სპეციალური საერთაშორისო მისია. მაკრონის თქმით, საჭირო რესურსები მობილიზებულია და მზადაა ოპერატიული განლაგებისთვის. საზღვაო ტრაფიკის აღდგენა ყოველგვარი დამატებითი გადასახადებისა და შეზღუდვების გარეშე, პრეზიდენტის შეფასებით, გლობალური ეკონომიკური სტაბილურობის გარანტია.

ემანუელ მაკრონი ხაზს უსვამს, რომ მიღწეული შეთანხმება მხოლოდ დასაწყისია. მისი თქმით, ეს პროცესი გზას უხსნის უფრო ფართომასშტაბიან მოლაპარაკებებს ახლო აღმოსავლეთში მყარი მშვიდობის მისაღწევად. საფრანგეთი მზად არის, აქტიურად ჩაერთოს ირანის ბირთვულ და ბალისტიკურ პროგრამებთან, ასევე რეგიონულ დესტაბილიზაციის პოლიტიკასთან დაკავშირებული საკითხების განხილვაში.

საფრანგეთის პრეზიდენტი ასევე გამოეხმაურა ლიბანში არსებულ ვითარებას. მან დაადასტურა, რომ პარიზი კვლავაც დაუჭერს მხარს ლიბანის ხელისუფლების ძალისხმევას, რომელიც სახელმწიფოს სუვერენიტეტის აღდგენისკენ არის მიმართული. მაკრონის თქმით, ლიბანის ტერიტორიული მთლიანობისა და მოსახლეობის უსაფრთხოებისათვის მყარი და მდგრადი ცეცხლის შეწყვეტა კრიტიკულად მნიშვნელოვანია.