ევროპული საბჭოს პრეზიდენტის, ანტონიუ კოშტას ოფისმა კრემლთან დიპლომატიური კონტაქტების დამყარება დაადასტურა. ბრიუსელის განცხადებით, მიზანი კომუნიკაციის არხების გახსნაა, თუმცა ხაზგასმით აღინიშნა, რომ ამ ეტაპზე რაიმე არსებითი საკითხი განხილული არ ყოფილა.

ევროკავშირის ოფიციალური პირის თქმით, რომელიც ანონიმურად საუბრობს, „ხანმოკლე კონტაქტები“ გასული კვირების განმავლობაში შედგა. ეს ნაბიჯი იმ დროს გადაიდგა, როდესაც ევროპაში სულ უფრო აქტიურად მსჯელობენ რუსეთთან დიალოგის საჭიროებაზე უკრაინის ომის დასრულების მიზნით.

საკითხის აქტუალურობა განპირობებულია იმ ფონით, რომ აშშ-ის მცდელობები ომის შეჩერებასთან დაკავშირებით ჩიხშია შესული, ხოლო პრეზიდენტი დონალდ ტრამპი ყურადღებას ირანის მიმართულებაზე ამახვილებს. უკრაინის პრეზიდენტი ვოლოდიმირ ზელენსკი ევროპელ ლიდერებს მეტი აქტიურობისკენ მოუწოდებს.

„ნებისმიერ მომავალ სცენარში ევროკავშირს აქვს კონკრეტული ინტერესები, რომელთა დაცვაც საჭირო იქნება, ამიტომ მნიშვნელოვანია რუსეთთან დიპლომატიური კავშირის დამყარება“, - აცხადებენ ევროკავშირის სტრუქტურებში. თუმცა, ბრიუსელი კვლავ ხაზს უსვამს, რომ არ არის შუამავალი და სრულად უჭერს მხარს უკრაინას სამართლიანი მშვიდობის მიღწევაში.

ევროპული საბჭოს პრეზიდენტი ანტონიუ კოშტა მჭიდროდ თანამშრომლობს ევროპელ ლიდერებთან, რათა განისაზღვროს რუსეთთან ურთიერთობის შესაძლო ფორმატები და ის საკითხები, რომლებიც შესაფერის დროს უნდა განიხილონ.

ამავდროულად, მოსკოვში გამართულ იშვიათ შეხვედრაზე დიდი ბრიტანეთის, საფრანგეთისა და გერმანიის ელჩებმა მოსკოვსა და კიევს შორის პირდაპირი მოლაპარაკებებისკენ მოუწოდეს. საფრანგეთში გამართულ „დიდი შვიდეულის“ სამიტზე კი დონალდ ტრამპმა განაცხადა, რომ მოსკოვმა ომის დასასრულებლად შეთანხმებას უნდა მიაღწიოს.

თავად ვოლოდიმირ ზელენსკის თქმით, ვლადიმირ პუტინმა სამიტის ფარგლებში შეხვედრაზე უარი განაცხადა, თუმცა მან ტრამპს შესთავაზა, რომ რუსეთის ლიდერთან შეხვედრა შეერთებულ შტატებშიც შესაძლებელი იქნებოდა.