საქართველოში ფეროშენადნობთა მწარმოებელი მცირე და საშუალო საწარმოების ნაწილი გაჩერდა. დარგის წარმომადგენლები აცხადებენ, რომ საერთაშორისო ბაზარზე არსებული ფასები და ელექტროენერგიის გაძვირებული ტარიფი წარმოებას წამგებიანს ხდის.

მიუხედავად იმისა, რომ 2026 წლის იანვრიდან პროდუქციაზე ფასები 100-150 დოლარით გაიზარდა, ეს ცვლილება სექტორის კრიზისიდან გამოსაყვანად არასაკმარისია. AMB Alloys-ის აღმასრულებელი დირექტორი ილია გოგსაძე განმარტავს, რომ მოთხოვნის მატება ძირითადად ახლო აღმოსავლეთში მიმდინარე კონფლიქტებითა და ლოგისტიკური შეფერხებებითაა განპირობებული, რაც თურქეთიდან ქართულ ფეროსილიკომანგანუმზე ინტერესს ზრდის. თუმცა, მიღებული ფასნამატი საწარმოო ხარჯებს ვერ ფარავს.

ტარიფების ზრდა და შეღავათების არარსებობა

2 ფოტო — დააჭირე გასადიდებლად

სექტორისთვის ყველაზე მწვავე პრობლემად ელექტროენერგიის ტარიფი რჩება. სემეკის გადაწყვეტილებით, რომელიც პირველ აპრილს ამოქმედდა, 10 კილოვოლტ ძაბვის საფეხურზე განაწილების ტარიფი 7.48 თეთრით გაიზარდა.

კომპანიებმა ვერ მოახერხეს წვდომის მიღება შეღავათიან ჰიდრორესურსებზე, რაც გაზაფხულისა და ზაფხულის პერიოდში ტრადიციული პრაქტიკა იყო. შედეგად, მაისის ბოლოს რუსთავში მოქმედმა საწარმომ საქმიანობა შეაჩერა. ანალოგიურ მდგომარეობაში აღმოჩნდნენ სხვა მცირე მწარმოებლებიც, რომელთა წარმადობა თვეში 500-დან 1000 ტონამდე მერყეობს.

„მოლოდინები იმის თაობაზე, რომ მიგვეღო სეზონურად მაინც შეღავათიანი ელექტროენერგია ჭარბი ჰიდრორესურსების პირობებში, სამწუხაროდ არ გამართლდა“, – ამბობს ილია გოგსაძე.

მისი თქმით, დარგმა კომუნიკაცია დაამყარა ეკონომიკის სამინისტროსთან, ესკოსთან და სახელმწიფო ელექტროსისტემასთან, თუმცა ამ დროისთვის სტატუს-კვო უცვლელია. კომპანიები, რომლებიც წარმოების განახლებას გეგმავდნენ, ამ ინიციატივების გადადებას იძულებულნი გახდნენ.

სექტორის წარმომადგენლები მოითხოვენ, რომ სახელმწიფო უწყებებმა დარგის გადასარჩენად სათანადო ყურადღება გამოიჩინონ. წინააღმდეგ შემთხვევაში, ეკონომიკური თვალსაზრისით მნიშვნელოვანი სიმძლავრეების ამუშავება გაურკვეველი ვადით გადაიდება.