გაეროს გენერალურმა ასამბლეამ აფხაზეთიდან და ცხინვალის რეგიონიდან იძულებით გადაადგილებულ პირთა და ლტოლვილთა სტატუსის შესახებ რეზოლუცია მიიღო. 80-ე სესიაზე მიღებული დოკუმენტი ადასტურებს დევნილთა უფლებას, დაბრუნდნენ საკუთარ სახლებში უსაფრთხო და ღირსეულ პირობებში.

წელს რეზოლუციის წინააღმდეგ მხოლოდ რვა ქვეყანა წავიდა. ეს არის ისტორიული მინიმუმი მას შემდეგ, რაც საქართველო ამ დოკუმენტს 16 წლის წინ პირველად წარუდგინა ასამბლეას. წინააღმდეგ ხმა მისცეს რუსეთმა, კუბამ, ბელარუსმა, ნიკარაგუამ, სუდანმა, ბურუნდიმ, ეკვატორულმა გვინეამ და კონგოს დემოკრატიულმა რესპუბლიკამ.

რეზოლუციას მხარი 107-მა სახელმწიფომ დაუჭირა, რაც გასული წლის მაჩვენებლის იდენტურია. მნიშვნელოვნად გაიზარდა დოკუმენტის თანაავტორთა რიცხვი — წელს მათ რიგებში 68 ქვეყანაა, რაც ოთხით მეტია 2025 წელთან შედარებით. თავი შეიკავა 55-მა სახელმწიფომ, მათ შორის ჩინეთმა, ისრაელმა, ირანმა და ცენტრალური აზიის ქვეყნებმა.

საქართველოს საგარეო საქმეთა მინისტრმა მაკა ბოჭორიშვილმა აღნიშნა, რომ ეს შედეგი ქართული დიპლომატიური სამსახურის ინტენსიური მუშაობის შედეგია. მისი თქმით, რეზოლუცია უკვე იქცა გლობალურ ინიციატივად, რაც საერთაშორისო თანამეგობრობის მხარდაჭერას კიდევ ერთხელ უსვამს ხაზს.

რა არის რეზოლუციის პრაქტიკული მნიშვნელობა?

მიუხედავად იმისა, რომ დოკუმენტი რეკომენდაციული ხასიათისაა, მას პრაქტიკული მექანიზმები აქვს. რეზოლუცია გაეროს გენერალურ მდივანს ავალდებულებს, ყოველწლიურად მოამზადოს ანგარიში მისი შესრულების შესახებ. თბილისისთვის ეს განსაკუთრებით მნიშვნელოვანია, რადგან ოკუპირებულ რეგიონებში საერთაშორისო მონიტორინგის მექანიზმები არ არსებობს.

დოკუმენტი ასევე გმობს ოკუპირებულ ტერიტორიებზე განხორციელებულ ძალადობრივ დემოგრაფიულ ცვლილებებს და მოუწოდებს ჟენევის მოლაპარაკებების მონაწილეებს, გაააქტიურონ ძალისხმევა უსაფრთხოებისა და ადამიანის უფლებების გაუმჯობესების მიმართულებით. ავტორთა აზრით, ამ საკითხებში პროგრესის გარეშე დევნილთა დაბრუნება შეუძლებელია.

3 ფოტო — დააჭირე გასადიდებლად