საქართველოს პრემიერ-მინისტრმა ირაკლი კობახიძემ ყირგიზეთში ოფიციალური ვიზიტის ფარგლებში ორმხრივი თანამშრომლობის ახალი ეტაპი დაიწყო. ბიშკეკში გამართული შეხვედრების შედეგად, მხარეებმა ათამდე შეთანხმებასა და მემორანდუმს მოაწერეს ხელი, რაც სხვადასხვა სექტორს — ტრანსპორტიდან დაწყებული ბირთვული უსაფრთხოებით დამთავრებული — მოიცავს.

ერთ-ერთი უმნიშვნელოვანესი მიმართულება საავიაციო მიმოსვლაა. მხარეები განიხილავენ ქვეყნებს შორის პირდაპირი ავიარეისების დანიშვნის შესაძლებლობას, რაც ეკონომიკური და ტურისტული კავშირების გაძლიერებას შეუწყობს ხელს.

ეკონომიკური ბლოკის გარდა, შეთანხმებები მოიცავს ვეტერინარიულ კონტროლს. ეს ნაბიჯი პირდაპირ კავშირშია სასოფლო-სამეურნეო პროდუქციის ვაჭრობასთან და ცხოველთა დაავადებების მართვასთან, რაც ორმხრივი სავაჭრო ბრუნვის გამარტივებას ემსახურება.

საგანმანათლებლო მიმართულებით დაგეგმილია სტუდენტების, მკვლევრებისა და პედაგოგების გაცვლითი პროგრამები. უნივერსიტეტებსა და სკოლებს შორის თანამშრომლობა მიზნად ისახავს აკადემიური გამოცდილების გაზიარებას.

ციფრული ტრანსფორმაცია და სახელმწიფო სერვისები

საქართველოს იუსტიციის მინისტრმა პაატა სალიამ ხაზი გაუსვა ციფრული მმართველობის მნიშვნელობას. მხარეები შეთანხმდნენ, რომ ითანამშრომლებენ საჯარო სერვისების განვითარებისა და პენიტენციური სისტემის რეფორმირების საკითხებში.

«ყირგიზეთმა მნიშვნელოვან შედეგებს მიაღწია დებიუროკრატიზაციისა და ციფრული ტრანსფორმაციის მიმართულებით. მათი გამოცდილება ჩვენთვის საინტერესოა, ისევე როგორც მათთვის — ჩვენი მიღწევები იუსტიციის სახლების განვითარების კუთხით», — განაცხადა პაატა სალიამ.

ამ მიზნით, იუსტიციის უწყებები სამუშაო ჯგუფების შექმნას გეგმავენ, რომლებიც გამოცდილების გაცვლას უზრუნველყოფენ.

უსაფრთხოება და საგარეო კავშირები

ერთ-ერთი ყველაზე სპეციფიკური და მოულოდნელი სფერო რადიაციული და ბირთვული უსაფრთხოებაა. შეთანხმება ითვალისწინებს სახიფათო მასალების კონტროლს, სპეციალისტების მომზადებასა და საგანგებო სიტუაციებზე რეაგირების მექანიზმების დახვეწას.

3 ფოტო — დააჭირე გასადიდებლად

გარდა ამისა, ხელმოწერილია სამოქმედო გეგმები სპორტის, სახელმწიფო ქონების მართვისა და საგარეო საქმეთა სამინისტროების ურთიერთთანამშრომლობისთვის 2027-2028 წლების პერიოდისთვის.