პარტია „გახარია საქართველოსთვის“ საპარლამენტო ფრაქციის თავმჯდომარის მოადგილე, გიგა ფარულავა აცხადებს, რომ არსებულ პოლიტიკურ ვითარებაში უვიზო მიმოსვლის შეჩერების საფრთხეზე სრული პასუხისმგებლობა მმართველ გუნდს ეკისრება. მისი თქმით, ეს მონაპოვარი ქართველ ხალხს ეკუთვნის და შეზღუდვები მოქალაქეებზე არ უნდა აისახოს.

ფარულავას განმარტებით, პოლიტიკური სპექტრის მხრიდან 11 ივნისის თარიღის პოპულისტური გამოყენება მიზანშეწონილი არ არის. ის აღნიშნავს, რომ უვიზო მიმოსვლასთან დაკავშირებული საკითხები თავდაპირველად ტექნიკური ხასიათის იყო და დიპლომატიურ ვიზებს უკავშირდებოდა.

3 ფოტო — დააჭირე გასადიდებლად

„ყველაფერს ვაკეთებთ, რათა უვიზო მიმოსვლის შეზღუდვა ქართველ ხალხს არ შეეხოს. ეს ჩვენი მოქალაქეების მონაპოვარია და თუ ვინმეს პასუხისმგებლობა ეკისრება, ისინი უშუალოდ ხელისუფლების წარმომადგენლები არიან“, — განაცხადა გიგა ფარულავამ.

პოლიტიკოსი ხაზს უსვამს, რომ საჭიროა პასუხისმგებლობის პერსონიფიცირება. მისი თქმით, ხელისუფლების არადემოკრატიულმა ნაბიჯებმა ქვეყანა დღევანდელ მძიმე მდგომარეობამდე მიიყვანა. მიუხედავად ამისა, ოპოზიციაში იმედს იტოვებენ, რომ საერთაშორისო პარტნიორების კეთილგონიერების შედეგად, რიგითი მოქალაქეები არ დაზარალდებიან.

ფარულავას განცხადებით, პარტია „გახარია საქართველოსთვის“ განაგრძობს მუშაობას, რათა ევროკავშირთან უვიზო მიმოსვლის სტატუსი საქართველოს მოქალაქეებისთვის უცვლელი დარჩეს, მიუხედავად ხელისუფლების მიერ გატარებული პოლიტიკისა.