სურსათის ეროვნული სააგენტოს ინიციატივით, თბილისში სამეცნიერო კონფერენცია გაიმართა, რომელიც კლიმატური პირობების გავლენას მცენარეთა დაცვის სისტემებზე მიეძღვნა. შეხვედრას გარემოს დაცვისა და სოფლის მეურნეობის მინისტრი დავით სონღულაშვილი დაესწრო.

მინისტრმა ხაზი გაუსვა გლობალური კლიმატური ცვლილებების მზარდ საფრთხეებს. მისი განცხადებით, მავნებლებისა და დაავადებების გავრცელება პირდაპირ აზარალებს სოფლის მეურნეობას. სტატისტიკის მიხედვით, მავნე ორგანიზმებს მსოფლიო სასოფლო-სამეურნეო წარმოების 20-40%-ის განადგურება შეუძლიათ.

„ჩვენი ამოცანაა, ფერმერებს შევუქმნათ უსაფრთხო გარემო წარმოებისთვის, მომხმარებლებს მივაწოდოთ უვნებელი პროდუქცია და საერთაშორისო ბაზრებზე გავაძლიეროთ ქართული აგროსასურსათო პროდუქციის სანდოობა“, — განაცხადა დავით სონღულაშვილმა კონფერენციაზე.

სამუშაო სესიების ფარგლებში სპეციალისტებმა განიხილეს პესტიციდების მიზნობრივი გამოყენება და ფიტოსანიტარიული რისკების მართვის თანამედროვე მეთოდები. სურსათის ეროვნული სააგენტოს უფროსმა გიორგი იაკობაშვილმა დამსწრე საზოგადოებას გააცნო ის სახელმწიფო პროგრამები, რომლებიც უკვე აქტიურად ხორციელდება მავნე ორგანიზმებთან ბრძოლის კუთხით.

3 ფოტო — დააჭირე გასადიდებლად

საქართველო საერთაშორისო სტანდარტების დანერგვას 2007 წლიდან, მცენარეთა დაცვის საერთაშორისო კონვენციაში (IPPC) გაწევრიანების შემდეგ ცდილობს. 2016 წლიდან ქვეყანა ასევე არის ევროპის და ხმელთაშუა ზღვის მცენარეთა დაცვის ორგანიზაციის (EPPO) წევრი.

ევროკავშირთან ასოცირების შეთანხმების ფარგლებში, მიმდინარეობს კანონმდებლობის ჰარმონიზაცია. პროცესი მოიცავს 80-მდე ნორმატიული აქტის ევროპულ რეგულაციებთან შესაბამისობაში მოყვანას, რაც ქართული აგროპროდუქციის ექსპორტისთვის ახალ შესაძლებლობებს ხსნის.

კონფერენციაში მონაწილეობა მიიღეს დარგობრივი ასოციაციების წარმომადგენლებმა, მეცნიერებმა, აგროსექტორის სპეციალისტებმა და ფერმერებმა, რომლებმაც ერთობლივი ძალისხმევით განსაზღვრეს სექტორის მდგრადი განვითარების გზები.