საქართველო ზაფხულის სეზონს მასშტაბური ტექნოლოგიური ღონისძიებით ხვდება. 19-დან 21 ივნისის ჩათვლით, თბილისი „გლობალ ტექ ვიქენდ 2026“-ს (GTWT 2026) უმასპინძლებს, რომელიც რეგიონის ტექნოლოგიური ტრანსფორმაციის მისიას აერთიანებს.

სამი დღის განმავლობაში დედაქალაქის სხვადასხვა ლოკაცია საერთაშორისო გამოცდილების გაზიარებისა და საქმიანი კავშირების ცენტრად იქცევა. ორგანიზატორების ინფორმაციით, ღონისძიება 10 000-ზე მეტ სტუმარს მიიღებს.

ღონისძიების პროგრამა და ლოკაციები

2 ფოტო — დააჭირე გასადიდებლად

GTWT 2026-ის ფორმატი სამ ძირითად დღეზეა გადანაწილებული:

  • 19 ივნისი (პარასკევი): „Side-events“ დღე. თბილისის მასშტაბით, სასტუმროებში, კო-ვორქინგ სივრცეებსა და უნივერსიტეტებში 80-ზე მეტი ღონისძიება, მათ შორის ვორქშოფები და დახურული სამუშაო შეხვედრები გაიმართება.
  • 20 ივნისი (შაბათი): მთავარი დღე Factory Tbilisi-ში. ყოფილი „კოკა-კოლას“ საწარმოს ტერიტორია სექტორულ პავილიონებად დაიყოფა და 10 სხვადასხვა მიმართულებას მოიცავს: ხელოვნური ინტელექტი, ფინტექი, Web3, ურბანული ინოვაციები, კრეატიული ტექნოლოგიები და სხვა.
  • 21 ივნისი (კვირა): კულტურული გამოცდილებები, არაფორმალური ბიზნეს შეხვედრები და დახურვის ცერემონია.

ჯაბა კიკვიძის, მოძრაობის თანადამფუძნებლის თქმით, წელს მოწვეულ სტუმართა რაოდენობა გაორმაგდა, რაც მიზნად ისახავს ადგილობრივი ტექ-ეკოსისტემის სინქრონიზაციას გლობალურ გამოცდილებასთან. ღონისძიებაში მონაწილეობას მიიღებენ ისეთი გიგანტი კომპანიების წარმომადგენლები, როგორებიცაა Google, Apple, Revolut, Nike და სხვა.

რატომ არის ეს მნიშვნელოვანი?

GTWT 2026-ის მასშტაბი ციფრებში ასე გამოიყურება: 200-ზე მეტი სპიკერი, 150-ზე მეტი კომპანია და 300-ზე მეტი ინვესტორი. ეს პლატფორმა ქართულ აუდიტორიას აძლევს შესაძლებლობას, პირდაპირ დაუკავშირდეს გლობალური პროექტების მამოძრავებელ ძალას.

პარტნიორებთან ურთიერთობის ხელმძღვანელის, მედეა ჯანჯღავას განცხადებით, ღონისძიების მრავალფეროვნება პარტნიორების რაოდენობის ზრდამაც განაპირობა, რაც ადასტურებს, რომ ტექნოლოგიური ტრანსფორმაცია ბიზნესის თითქმის ყველა სექტორისთვის პრიორიტეტულია.