ირანის ისლამური რევოლუციის გუშაგთა კორპუსმა (IRGC) ოფიციალურად გამოაცხადა ჰორმუზის სრუტის სრული ბლოკირების შესახებ. გადაწყვეტილება, როგორც თეირანში აცხადებენ, აშშ-ის მიერ განხორციელებულ საჰაერო დარტყმებს უკავშირდება.

შეზღუდვა ეხება ყველა სახის საზღვაო ტრანსპორტს, მათ შორის სავაჭრო გემებსა და ნავთობტანკერებს. ირანული მხარის გაფრთხილება მკაცრია: ნებისმიერი ხომალდი, რომელიც სრუტის გავლის მცდელობას განახორციელებს, ავტომატურად იქცევა სამხედრო სამიზნედ.

ირანის საჰაერო-კოსმოსური ძალების სარდალმა, საიედ ჰოსეინ მუსავი ეფთეხარმა განაცხადა, რომ თეირანი მზადაა რეგიონი „ჯოჯოხეთად აქციოს“, თუ აშშ ჰორმუზის სრუტეში გადაადგილებას საფრთხის შემცველს გახდის.

3 ფოტო — დააჭირე გასადიდებლად

ვითარება ჰორმუზის სრუტეში უკიდურესად დაძაბულია. ირანული სახელმწიფო მედია ავრცელებს ინფორმაციას, რომ სრუტეში აშშ-სა და ირანის ძალებს შორის დაპირისპირება მოხდა, რის შედეგადაც თითქოს ორი ხომალდი დაზიანდა. თუმცა, აშშ-ის ცენტრალური სარდლობა (CENTCOM) ამ ცნობებს კატეგორიულად უარყოფს და აცხადებს, რომ მათი სამხედრო ხომალდები არ დაზიანებულან.

ვაშინგტონის ოფიციალური პოზიცია განსხვავებულია: პენტაგონის წარმომადგენლები ირწმუნებიან, რომ სრუტე კვლავ ღიაა და სავაჭრო გემები მოძრაობას ჩვეულ რეჟიმში აგრძელებენ.

ჰორმუზის სრუტე მსოფლიო ნავთობმომარაგების ერთ-ერთი ყველაზე კრიტიკული არტერიაა. მისი ნებისმიერი სახით ჩაკეტვა გლობალურ ბაზარზე ნავთობის ფასების მკვეთრ ზრდას იწვევს, რაც პირდაპირ აისახება ენერგეტიკულ უსაფრთხოებაზე.