ამერიკელმა კონგრესმენმა ჯო უილსონმა აშშ-ის წარმომადგენელთა პალატაში სიტყვით გამოსვლისას „ქართული ოცნების“ ხელისუფლება მწვავედ გააკრიტიკა. უილსონის განცხადებით, მმართველი პარტია საქართველოს ინტერესებს ჩინეთის კომუნისტური პარტიის, ვლადიმერ პუტინისა და ირანის სასარგებლოდ თმობს.

კონგრესმენმა ხაზგასმით აღნიშნა, რომ მიმდინარე პოლიტიკური კურსი ეწინააღმდეგება როგორც ქართველი ხალხის ნებას, ისე აშშ-ის სტრატეგიულ ინტერესებს რეგიონში. უილსონის თქმით, „ქართული ოცნება“ არალეგიტიმურია და ხელისუფლებაში არჩევნების გაყალბების შედეგად დარჩა.

„ჩვენ ვხედავთ, რომ ხელისუფლება ანტიამერიკულ პროპაგანდას ავრცელებს და პრეზიდენტ დონალდ ტრამპს შეურაცხყოფას აყენებს. მათ ბრალდებები წაუყენეს აშშ-ის სახელმწიფო მდივანს, მარკო რუბიოს, რაც სრულიად მიუღებელია“, - განაცხადა უილსონმა. კონგრესმენმა ასევე გაიხსენა პრეზიდენტ სალომე ზურაბიშვილის ვიზიტი ტრამპის ინაუგურაციაზე, როგორც ლეგიტიმური დემოკრატიული პროცესის ნაწილი.

უილსონის განცხადებით, თბილისში მიმდინარე საპროტესტო აქციები ადასტურებს, რომ ქართველი ხალხი ამერიკასთან მჭიდრო თანამშრომლობის მომხრეა. მისი თქმით, „ქართული ოცნების“ ქმედებები საფრთხეს უქმნის იმ მიღწევებს, რაც აშშ-მა სამხრეთ კავკასიაში დაამკვიდრა.

3 ფოტო — დააჭირე გასადიდებლად

კონგრესმენმა ხელისუფლებისგან რამდენიმე კონკრეტული ნაბიჯის გადადგმა მოითხოვა:

  • პოლიტპატიმრების დაუყოვნებლივ გათავისუფლება;
  • პოლიტიკურად მოტივირებული დევნის შეწყვეტა;
  • სამართლიანი საარჩევნო გარემოს უზრუნველყოფა;
  • ამერიკული ბიზნესისთვის ხელის შემშლელი კანონების გაუქმება;
  • სიტყვის თავისუფლების პატივისცემა.

ჯო უილსონმა აღნიშნა, რომ „ქართული ოცნების“ მიერ გატარებული პოლიტიკა უნდა შეიცვალოს, რათა ქვეყანამ დაუბრუნდეს დემოკრატიულ განვითარებას.