საქართველოს პრემიერ-მინისტრმა ირაკლი კობახიძემ ევროპული ბიუროკრატიის ქმედებები შეაფასა და აღნიშნა, რომ 2024 წლის 28 ნოემბრის შემდეგ მათ შანტაჟის თითქმის ყველა ბერკეტი გაუუქმდათ.

პრემიერის თქმით, ამჟამად ერთადერთი დარჩენილი ინსტრუმენტი, რომელსაც ევროპელი ჩინოვნიკები იყენებენ, ვიზალიბერალიზაციის საკითხია. კობახიძის განმარტებით, აღნიშნული მიდგომა მიზნად ისახავს ქართველი ხალხის დაშანტაჟებას, თუმცა ამგვარ მცდელობებს არავითარი პერსპექტივა არ გააჩნია.

3 ფოტო — დააჭირე გასადიდებლად

„რა თქმა უნდა, ამ განცხადებებს არავითარი ფასი არ აქვს. ვფიქრობ, თავადაც კარგად აანალიზებენ პროცესებს და ესმით, რომ მსგავსი შანტაჟი ვერანაირ შედეგს ვერ გამოიღებს“, – განაცხადა მთავრობის მეთაურმა ჟურნალისტებთან საუბრისას.

ირაკლი კობახიძის მტკიცებით, ევროპული სტრუქტურების მხრიდან განხორციელებული ზეწოლა აბსოლუტურად ფუჭად ჩაივლის. მისი შეფასებით, საერთაშორისო პარტნიორების ეს რიტორიკა შინაარსობრივად დატვირთული არ არის და ვერ შეცვლის საქართველოში მიმდინარე პოლიტიკურ რეალობას.

პრემიერმა ხაზგასმით აღნიშნა, რომ საქართველოს ხელისუფლება არ აპირებს მსგავსი ტიპის პოლიტიკური ზეწოლის გათვალისწინებას და ქვეყანა საკუთარი კურსის მიხედვით გააგრძელებს მოქმედებას.