საქართველოს დეველოპერულ სექტორში მნიშვნელოვანი ცვლილებაა — ერთ-ერთმა წამყვანმა კომპანიამ, m²-მა, მფლობელი შეიცვალა. ინფორმაცია ამის შესახებ 5 ივნისს საინვესტიციო ჯგუფმა Georgia Capital-მა (GCAP) გაავრცელა, რომლის შემადგენლობაშიც დეველოპერი გასული ორი ათწლეულის განმავლობაში შედიოდა.

Georgia Capital-ის განმარტებით, აღნიშნული გადაწყვეტილება ჯგუფის სტრატეგიის ნაწილია. კომპანია მიზნად ისახავს არაპროფილური აქტივებისგან გათავისუფლებას და უფრო კაპიტალტევად მიმართულებებზე კონცენტრაციას. გარიგების ფინანსური დეტალები ამ ეტაპზე კომერციულ საიდუმლოდ რჩება.

3 ფოტო — დააჭირე გასადიდებლად

სააგენტო bm.ge-ს მონაცემებით, m²-ის ახალი მფლობელი აპრილში დაფუძნებული კომპანია „ტრასტ ჰოლდინგია“. წილების 70%-ს ბიზნესმენი ლაშა კვაჭაძე ფლობს, ხოლო დარჩენილ 30%-ს დიმიტრი ადამია, რომელიც ამავდროულად კომპანიის დირექტორის პოზიციასაც დაიკავებს.

ლაშა კვაჭაძე ფართო საზოგადოებისთვის ცნობილია, როგორც კომპანია Blox Group-ის თანადამფუძნებელი. სწორედ ეს კომპანია ახორციელებს თბილისში „ტრამპ თაუერის“ პროექტს, რომელიც რეგიონში დონალდ ტრამპის ბრენდის ქვეშ პირველი და ყველაზე მაღალი ცათამბრჯენი უნდა გახდეს.

კვაჭაძის საქმიანობა პოლიტიკურ წრეებშიც აქტიურად განიხილება. ოპოზიციური ტელეკომპანია „ტვ პირველის“ ცნობით, ბიზნესმენი თბილისის მერისა და „ქართული ოცნების“ გენერალური მდივნის, კახა კალაძის უახლოეს გარემოცვასთან არის დაკავშირებული. გავრცელებული ინფორმაციით, კვაჭაძისა და კალაძის მეუღლეები საერთო ბიზნეს ინტერესებს იზიარებენ.

სხვადასხვა მედიასაშუალება წარსულშიც ამახვილებდა ყურადღებას იმ გარემოებაზე, რომ კვაჭაძესთან დაკავშირებული კომპანიები თბილისის ე.წ. პრობლემურ ზონებში მშენებლობის ნებართვებს გამარტივებული წესით იღებდნენ.

კომპანია m² 2006 წელს დაარსდა და წლების განმავლობაში სწრაფი ტემპით განვითარდა. 2018 წელს მისი საპროექტო პორტფელი 49 მილიონ დოლარს შეადგენდა, რაც 645 ბინას მოიცავდა. უკვე ერთი წლის შემდეგ, პორტფელი 65 მილიონ დოლარამდე გაიზარდა და ათასზე მეტი ბინა გააერთიანა. კომპანიის კონცეფცია უპირატესად კვარტალური განაშენიანების პრინციპს ეფუძნებოდა.