საქართველოს შინაგან საქმეთა სამინისტრომ მესტიის მუნიციპალიტეტში უკანონო კრიპტომაინინგის წინააღმდეგ მორიგი მასშტაბური ოპერაცია განახორციელა. უწყების ინფორმაციით, სამართალდამცველებმა 47 ერთეული სპეციალური აპარატი ამოიღეს, რომლებიც ციფრული ვალუტის გამომუშავებისთვის გამოიყენებოდა.

შსს-ს განცხადებით, ადგილობრივი მცხოვრებლები ელექტროენერგიის დიდი მოცულობის უკანონო მოხმარებით სისტემატურად ახდენდნენ კრიპტოვალუტის გენერაციას. ამ გზით ისინი არაკანონიერ შემოსავალს იღებდნენ, რაც ქვეყნის ენერგოსისტემას მნიშვნელოვან ზიანს აყენებს.

საქმეზე გამოძიება საქართველოს სისხლის სამართლის კოდექსის 229-ე მუხლის მე-2 ნაწილის „ბ“ ქვეპუნქტით მიმდინარეობს, რაც ენერგორესურსებით სარგებლობის წესების დარღვევას გულისხმობს. დანაშაული სამ წლამდე თავისუფლების აღკვეთას ითვალისწინებს. მიუხედავად აქტიური საგამოძიებო მოქმედებებისა, ამ დროისთვის დაკავებული პირი არ არის.

მესტიაში რეიდები ინტენსიურ რეჟიმში ტარდება. მხოლოდ ერთი დღით ადრე, შინაგან საქმეთა სამინისტრომ ექვსი ლოკაციის შემოწმების შედეგად 148 ერთეული მაინინგ-მოწყობილობა ამოიღო. გავრცელებულ კადრებში ჩანს, რომ მაღალმთიან სოფლებში მდებარე ფერმების გასანეიტრალებლად სპეციალური დანიშნულების რაზმებიც იყო მობილიზებული.

სვანეთში არსებული შეღავათიანი ტარიფი, რომელიც რეგიონის მხარდაჭერისთვისაა დაწესებული, არაკეთილსინდისიერმა მომხმარებლებმა უკანონო გამდიდრებისთვის გამოიყენეს. რეგიონში ელექტროენერგიის მოხმარება რამდენჯერმე გაიზარდა, რამაც ქსელების გადატვირთვა და ხშირი ავარიული გათიშვები გამოიწვია.

მთავრობის ინფორმაციით, 2025 წელს მესტიამ დაახლოებით 133 მილიონი კილოვატ-საათი ელექტროენერგია მოიხმარა, რაც ქვეყნის სხვა მუნიციპალიტეტების მაჩვენებლებს მნიშვნელოვნად აღემატება. სახელმწიფო წლიურ ზარალს 20-25 მილიონი ლარის ფარგლებში აფასებს, რაც საბოლოო ჯამში, მთელი ქვეყნის მომხმარებელზე ნაწილდება.

3 ფოტო — დააჭირე გასადიდებლად

ამ პრობლემის გადასაჭრელად, ხელისუფლებამ სისტემური ცვლილებები დააანონსა. მესტიაში დამონტაჟდება მრიცხველები და დაწესდება ელექტროენერგიის უფასო მოხმარების ზედა ზღვარი. დადგენილი ნორმის ზემოთ მოხმარებულ ენერგიაზე მოსახლეობას ტარიფის გადახდა მოუწევს.