ლიეტუვის პრეზიდენტმა გიტანას ნაუსედამ რუსეთის მიერ კიევზე განხორციელებული მორიგი სამხედრო დარტყმები მკაცრად გააკრიტიკა. თავდასხმის შედეგად დაზიანდა ისტორიული და სულიერი მნიშვნელობის ძეგლი — კიევ-პეჩერის ლავრა, რამაც საერთაშორისო საზოგადოების მწვავე რეაქცია გამოიწვია.

ნაუსედამ სოციალურ ქსელ X-ზე გავრცელებულ განცხადებაში აღნიშნა, რომ რუსეთის ქმედებები ადასტურებს აგრესორის სრულ უპატივცემულობას არა მხოლოდ ადამიანის სიცოცხლის, არამედ მსოფლიო კულტურული მემკვიდრეობის მიმართ. ლიეტუვის ლიდერის თქმით, ეს თავდასხმა იმ სულიერი ტრადიციების წინააღმდეგაცაა მიმართული, რომელსაც რუსეთი თავად აცხადებს საკუთარ იდენტობად.

3 ფოტო — დააჭირე გასადიდებლად
აგრესორისთვის არაფერია წმინდა. დადგა დრო, რომ რუსეთზე საერთაშორისო წნეხი გაძლიერდეს, რათა ამ ომს ბოლო მოეღოს! — აცხადებს გიტანას ნაუსედა.

ლიეტუვის პრეზიდენტის პოზიცია მკაფიოა: დიპლომატიური და ეკონომიკური იზოლაციის გაძლიერება ერთადერთი გზაა აგრესორის შესაჩერებლად. მისი განცხადება მოჰყვა კიევის ცენტრზე მიტანილ მასირებულ იერიშს, რომელმაც უკრაინის დედაქალაქის ინფრასტრუქტურასთან ერთად, კულტურულ და რელიგიურ ობიექტებსაც მიაყენა ზიანი.

საერთაშორისო დამკვირვებლები მიიჩნევენ, რომ რუსეთის მხრიდან კულტურული ძეგლების მიზანმიმართული დაბომბვა ომის ტაქტიკის ნაწილია, რომლის მიზანიც უკრაინელი ხალხის დემორალიზება და ისტორიული მეხსიერების წაშლაა. ნაუსედას მოწოდება, გაძლიერდეს ზეწოლა, კიდევ ერთხელ უსვამს ხაზს იმას, რომ ომის დასრულება კოლექტიური დასავლეთის უფრო მტკიცე პოზიციაზეა დამოკიდებული.