შინაგან საქმეთა სამინისტროს სიძულვილის ენის წინააღმდეგ ბრძოლის ახლად შექმნილმა სამმართველომ პირველი სამართლებრივი დავა დაიწყო. საქმე ეხება ადვოკატ შოთა თუთბერიძეს, რომელსაც უწყება პარლამენტის ვიცე-სპიკერ ნინო წილოსანის მიმართ სიტყვიერ შეურაცხყოფას ედავება.

სადავო კომენტარი დეპუტატის საჯარო პოსტის ქვეშ დაიწერა, როდესაც წილოსანი კანადაში ოფიციალური ვიზიტით იმყოფებოდა. მომხდარს სამართალდარღვევის ოქმის შედგენა და დღეს გამართული პირველი სასამართლო პროცესი მოჰყვა.

„შეურაცხყოფა ნორმა არ უნდა გახდეს“

ნინო წილოსანის განცხადებით, საზოგადოების გარკვეული ნაწილი წლების განმავლობაში ცდილობს ონლაინ სივრცე აგრესიულ გარემოდ აქციოს. მისი თქმით, ეს პრობლემა განსაკუთრებით მწვავედ დგას საჯარო მოხელეებისა და პოლიტიკოსების მიმართ.

„საზოგადოების პატარა, აგრესიულმა ნაწილმა გადაწყვიტა, რომ ჩვენი საჯარო სივრცე, ისევე როგორც ონლაინ, ექცია შეურაცხყოფების და ღირსების შემლახავ გარემოდ. დარწმუნებული ვარ, ამ ადამიანებს, რომლებიც იმდენად უმორალო და უსტანდარტოები არიან, ნამდვილად შეიძლება გინება და შეურაცხყოფა ნორმად მიაჩნდეთ,“ - აცხადებს წილოსანი.

პარლამენტის თავმჯდომარის მოადგილე ხაზს უსვამს, რომ სახელმწიფო უწყებები გააკეთებენ ყველაფერს, რათა მსგავსი ქმედებები დაუსჯელი არ დარჩეს. მისი თქმით, მიზანია, შეურაცხყოფა და ღირსების შელახვა არ იქცეს საზოგადოებრივ ნორმად.

სიძულვილის ენის წინააღმდეგ ბრძოლა

შინაგან საქმეთა სამინისტროს სიძულვილის ენის წინააღმდეგ ბრძოლის სამმართველო მიმდინარე წლის პირველ ივნისს ამოქმედდა. უწყების მთავარ ფუნქციას საჯარო სივრცეში კომუნიკაციის სისტემური მონიტორინგი წარმოადგენს.

სამმართველოს შექმნა სწორედ მსგავსი ტიპის სამართალდარღვევებზე რეაგირებას ემსახურება. როგორც წილოსანი აღნიშნავს, თითოეულ მსგავს შემთხვევას შესაბამისი სამართლებრივი რეაგირება მოჰყვება, რაც პრევენციული მექანიზმის როლს შეასრულებს.