თბილისის სასამართლომ ადვოკატი შოთა თუთბერიძე 4000 ლარით დააჯარიმა. გადაწყვეტილება დეპუტატ ნინო წილოსანის მიმართ განხორციელებულ სიტყვიერ შეურაცხყოფას უკავშირდება.

საქმეზე სამართალდარღვევის ოქმი შინაგან საქმეთა სამინისტროს სიძულვილის ენის წინააღმდეგ ბრძოლის სამმართველომ შეადგინა. ინციდენტის მიზეზი დეპუტატის საჯარო პოსტზე თუთბერიძის მიერ დაწერილი კომენტარი გახდა.

სასამართლო პროცესი დღეს გაიმართა, სადაც მხარეებმა საკუთარი პოზიციები წარმოადგინეს. ეს პირველი შემთხვევაა, როდესაც აღნიშნული სამმართველოს მიერ დაწყებული საქმე სასამართლო განხილვის ეტაპამდე მივიდა.

რა არის სიძულვილის ენის წინააღმდეგ ბრძოლის სამმართველო?

შინაგან საქმეთა სამინისტრომ სიძულვილის ენის წინააღმდეგ ბრძოლის ახალი სამმართველო მიმდინარე წლის პირველ ივნისს შექმნა. უწყების განმარტებით, სამმართველოს მთავარი ფუნქცია საჯარო სივრცეში, მათ შორის სოციალურ ქსელებში, კომუნიკაციის სისტემური მონიტორინგია.

სტრუქტურა მიზნად ისახავს სიძულვილის ენის პრევენციას და კანონით გათვალისწინებული ზომების გატარებას იმ შემთხვევებში, როდესაც საჯარო გამონათქვამები სცდება გამოხატვის თავისუფლების ფარგლებს და შეიცავს შეურაცხმყოფელ ან სიძულვილის შემცველ ელემენტებს.

საქართველოს კანონმდებლობით, საჯარო სივრცეში სიტყვიერი შეურაცხყოფა ადმინისტრაციულ პასუხისმგებლობას ითვალისწინებს. დღევანდელი გადაწყვეტილება ამ მიმართულებით სამართალდამცავი უწყებების გააქტიურებულ მუშაობაზე მიუთითებს.