თბილისის საქალაქო სასამართლოს გადაწყვეტილებით, ადვოკატი შოთა თუთბერიძე 4000 ლარის ოდენობით დაჯარიმდა. მოსამართლე დავით მაკარაძემ აღნიშნული სანქცია „ქართული ოცნების“ წევრ ნინო წილოსანის შეურაცხყოფის საქმეზე დააკისრა.

სადავო ეპიზოდი 2026 წლის 2 ივნისს მომხდარ ინციდენტს უკავშირდება. ნინო წილოსანმა სოციალურ ქსელში კანადაში ვიზიტის ამსახველი პოსტი გამოაქვეყნდა, რასაც შოთა თუთბერიძის მხრიდან კომენტარი მოჰყვა. თუთბერიძემ წილოსანს მიმართა: „მანდაც დე**ის ტ***ი უნდა გაგინონ, ნინიკო, თუ უბრალოდ ზოოპარკს ნახავთ და უცებ წამოხვალთ?”

ვინ დაიწყო საქმის წარმოება?

აღსანიშნავია, რომ ნინო წილოსანს სამართლებრივი დავა თავად არ დაუწყია. საქმის წარმოება შინაგან საქმეთა სამინისტროს „სიძულვილის ენის წინააღმდეგ ბრძოლის სამმართველომ“ დაიწყო. სამართალდარღვევის ოქმი სანდრო კეპაშვილმა შეადგინა. საქმე ადმინისტრაციულ სამართალდარღვევათა კოდექსის 173/1 მუხლის 16-ე პუნქტის პირველი ნაწილით წარიმართა, რაც პოლიტიკური თანამდებობის პირის სიტყვიერ შეურაცხყოფას გულისხმობს.

თავად შოთა თუთბერიძის განცხადებით, მან ნინო წილოსანს კომენტარის შესახებ თავადვე აცნობა. ადვოკატის თქმით, წილოსანმა მას პასუხის გაცემა აღუთქვა, თუმცა, საბოლოოდ, კომუნიკაცია არ შემდგარა.

ახალი სამმართველო და მონიტორინგი

შინაგან საქმეთა სამინისტროში სპეციალიზებული სამმართველოს შექმნა, რომელიც საჯარო სივრცეში სიძულვილის ენასა და აგრესიულ კამპანიებს გაუწევს მონიტორინგს, მამუკა მდინარაძემ 18 მაისს დააანონსა. უწყება 10 თანამშრომლით 1 ივნისიდან შეუდგა მუშაობას.