10 ივნისს გამთენიისას რუსეთის ფედერაციის ოცზე მეტ რეგიონში მასშტაბური საჰაერო თავდასხმა განხორციელდა. რუსეთის ხელისუფლებამ აღიარა, რომ ქვეყნის მასშტაბით დრონებისა და რაკეტების საფრთხის გამო, არაერთი აეროპორტის მუშაობა დროებით შეჩერდა.

ჩუვაშეთის რესპუბლიკის მეთაურმა, ოლეგ ნიკოლაევმა დაადასტურა, რომ სარაკეტო იერიში მიიტანეს ქალაქ ჩებოქსარიზე. თავდაპირველად დაუზუსტებელი ინფორმაციის შემდეგ, მოგვიანებით ცნობილი გახდა, რომ თავდასხმას სამი ადამიანი ემსხვერპლა. დამოუკიდებელი გამოცემა ASTRA-ს მონაცემებით, დარტყმის ობიექტი ქარხანა „პროგრესი“ იყო, რომელიც რუსულ არმიას სამხედრო პროდუქციით ამარაგებს. უკრაინული წყაროების ცნობით, იერიშისთვის შესაძლოა უკრაინული წარმოების რაკეტები „ფლამინგო“ გამოიყენეს.

იერიშები დაფიქსირდა როსტოვის ოლქშიც. გუბერნატორ იური სლიუსარის თქმით, მილეროვოს რაიონში დრონების ნამსხვრევების ჩამოცვენამ საწვავის საცავში ხანძარი გამოიწვია, რის გამოც ადგილობრივი მოსახლეობის ევაკუაცია გახდა საჭირო. მილეროვო სტრატეგიულად მნიშვნელოვანი წერტილია, სადაც სამხედრო აეროდრომი მდებარეობს.

ვლადიმირის ოლქში გუბერნატორმა ალექსანდრ ავდეევმა „ინფრასტრუქტურის ორ ობიექტზე“ გაჩენილ ხანძარზე ისაუბრა. რუსული და უკრაინული ტელეგრამ-არხები იუწყებიან, რომ ცეცხლი ნავთობის გადასაქაჩ სადგურ „ვტოროვოს“ მოედო.

სამარის ოლქში სამიზნე „როსნეფტის“ ნავთობგადამამუშავებელი ქარხანა გახდა. ადგილობრივი ხელისუფლების ცნობით, დრონების შეტევის შედეგად სამი ადამიანი დაშავდა. პარალელურად, ანექსირებულ სევასტოპოლში დაზიანდა მუზეუმ-პანორამა „სევასტოპოლის დაცვა 1854-1855 წლებში“.

რუსეთის თავდაცვის სამინისტროს ოფიციალური მონაცემებით, 9 ივნისის საღამოდან 10 ივნისის დილამდე, რუსეთის 19 რეგიონსა და ყირიმში 326 უკრაინული უპილოტო საფრენი აპარატი „გაანადგურეს“. თუმცა, ოფიციალურ სიაში არ მოხვდა ვლადიმირის ოლქი, სადაც ხელისუფლების წარმომადგენლებმა თავდასხმა დაადასტურეს.

უკრაინის მხარეს ამ შეტევებთან დაკავშირებით ოფიციალური განცხადება ჯერჯერობით არ გაუკეთებია.