ანთროპოლოგი ირაკლი ფიფია, რომელიც 2024 წლის 2 დეკემბერს გამართული პროევროპული აქციის დარბევისას დააკავეს, ძალოვანი უწყებების მხრიდან განხორციელებულ ფიზიკურ ანგარიშსწორებაზე საუბრობს. მისი თქმით, დაკავების პროცესი ძალადობრივი იყო და პოლიციის მიკროავტობუსში მას რამდენიმე საათის განმავლობაში სცემდნენ.

ფიფია ყვება, რომ რუსთაველის გამზირზე მიმდინარე მარშის შემდეგ, გაურკვეველი შემთხვევითობის გამო, ნიღბიანი სპეცრაზმელების უკან აღმოჩნდა. სწორედ ამ დროს მოხდა მისი იძულებითი დაკავება.

დაკავება და ფიზიკური ანგარიშსწორება

„ჯერ მოხდა ჩემი დაყაჩაღება, შემდეგ მიკროავტობუსში შეყვანა და რამდენიმე რაუნდი ცემის, შეურაცხყოფის და დაშინების,“ – იხსენებს ფიფია. მისი განცხადებით, მიკროავტობუსში დაახლოებით 10-11 დაკავებული იმყოფებოდა, რომლებსაც პოლიციელები სისტემატურად უსწორდებოდნენ.

ანთროპოლოგი აღნიშნავს, რომ მხოლოდ მის ცემაში 6 ნიღბიანი პირი მონაწილეობდა. ძალადობა იმდენად მძიმე იყო, რომ მან გონება რამდენჯერმე დაკარგა. საბოლოოდ, ფიფია საავადმყოფოში გადაიყვანეს ტვინის შერყევითა და სხეულის სხვადასხვა დაზიანებებით.

გამოძიების უშედეგობა

მიუხედავად იმისა, რომ ფიფიას ადვოკატი ყოველკვირეულად მიმართავს საგამოძიებო უწყებებს, საქმეზე ხელშესახები შედეგი არ არის. დაზარალებულის სტატუსი ადვოკატმა დიდი ძალისხმევის შედეგად მიიღო, თუმცა დამნაშავეების იდენტიფიცირება არ მომხდარა.

„სისტემა ჟონავს ყველა მიმართულებით. თუ არსებობს დაზარალებული, უნდა არსებობდეს დამზარალებელიც,“ – აცხადებს ირაკლი ფიფია.

ფიფია აცხადებს, რომ მას აქვს გარკვეული ინფორმაცია კონკრეტულ პირებზე, თუმცა იმედოვნებს, რომ სახელმწიფო გამოიჩენს ნებას და თავად გამოიძიებს ძალადობის ფაქტებს, ნაცვლად იმისა, რომ მოქალაქემ თავად მოუწიოს საჯაროდ დასახელება.