თბილისის პოლიციამ დიღმის მასივში მომხდარი სკანდალური შემთხვევის გამო ერთი პირი დააკავა. შინაგან საქმეთა სამინისტროს ინფორმაციით, დაკავებულს არასრულწლოვანის მიმართ გარყვნილი ქმედების ჩადენას ედავებიან.

შემთხვევა დიღმის მასივში მდებარე მაიაკოვსკის სკვერში, 2 ივნისს, დღის საათებში მოხდა. როგორც დაზარალებული 14 წლის გოგონას მშობელმა სოციალურ ქსელში განაცხადა, უცხო, ხნიერი მამაკაცი მოზარდს მიუახლოვდა და გარყვნილი ქმედება განახორციელა.

მოზარდმა შემთხვევის ადგილიდან გაქცევა მოახერხა და მომხდარის შესახებ დედას დაუყოვნებლივ შეატყობინა. მშობელი შემთხვევის ადგილზე მალევე მივიდა, რა დროსაც მან ბრალდებულთან კონფლიქტი მოაგვარა და მომხდარის შესახებ ვიდეომასალა გაავრცელა, რათა საზოგადოება გაეფრთხილებინა.

შინაგან საქმეთა სამინისტრომ ოპერატიული და საგამოძიებო მოქმედებების შედეგად ბრალდებული იმავე დღეს დააკავა. უწყების ცნობით, გამოძიება სისხლის სამართლის კოდექსის 141-ე მუხლის მე-2 ნაწილით მიმდინარეობს.

3 ფოტო — დააჭირე გასადიდებლად

აღნიშნული მუხლი არასრულწლოვანის მიმართ გარყვნილი ქმედების ჩადენას გულისხმობს და სასჯელის სახით 8-დან 12 წლამდე თავისუფლების აღკვეთას ითვალისწინებს. სამართალდამცველები საქმეზე საგამოძიებო მოქმედებებს აგრძელებენ.