რუსთავში მომხდარი ტრაგედიის გამო პოლიციამ 15 წლის მოზარდი დააკავა. მას ბრალად განზრახ მკვლელობა ედება. შემთხვევა გუშინ საღამოს მოხდა, გარდაცვლილი კი საშუალო ასაკის მამაკაცია.

არსებული ინფორმაციით, კონფლიქტი მოზარდსა და გარდაცვლილს შორის მოხდა. თუმცა, დაკავებულის ოჯახი მომხდარს სულ სხვა კონტექსტში განიხილავს და აცხადებს, რომ ბიჭი აუცილებელი მოგერიების ფარგლებში მოქმედებდა.

ოჯახის წევრების თქმით, მოზარდი გარდაბნის მუნიციპალიტეტის სოფელ ყესალოში, მშენებლობაზე მუშაობდა, სადაც გარდაცვლილი პრორაბად მუშაობდა. სამუშაო დღის დასრულების შემდეგ, მამაკაცმა მოზარდი ვახშამზე საკუთარ სახლში მიიპატიჟა.

ოჯახის ვერსიით, სახლში მისვლის შემდეგ მასპინძელმა კარი ჩაუკეტა, მოზარდს ფიზიკურად გაუსწორდა და მისი ძალადობრივად გაშიშვლება სცადა. სწორედ ამ ვითარებაში, მოზარდმა თავდაცვის მიზნით სამზარეულოს დანა აიღო და მამაკაცს რამდენიმე ჭრილობა მიაყენა.

„ბავშვი თავიდან ემუდარებოდა, კარი გაეღო და გაეშვა. მან არც კი იცოდა, რომ მამაკაცი გარდაიცვალა. როგორც კი კარი გააღო და გარეთ გამოვიდა, პირდაპირ პოლიციას ჩაბარდა და ყველაფერი მოუყვა“, — განაცხადა დაკავებულის ერთ-ერთმა ნათესავმა „TV პირველის“ ეთერში.

ოჯახი მოზარდის დაუყოვნებლივ გათავისუფლებას მოითხოვს და ხაზს უსვამს, რომ მან თავი სექსუალური ძალადობისგან დაიცვა. საქმეზე გამოძიება საქართველოს სისხლის სამართლის კოდექსის 108-ე მუხლით მიმდინარეობს.

3 ფოტო — დააჭირე გასადიდებლად

ამ დროისთვის, პროკურატურას არ გაუვრცელებია ინფორმაცია მოზარდისთვის ოფიციალური ბრალის წარდგენის შესახებ. სამართალდამცავები შემთხვევის დეტალებს იკვლევენ.