უკრაინამ რუსეთის ენერგეტიკული ინფრასტრუქტურის წინააღმდეგ მასშტაბური ოპერაცია განახორციელა. 31 მაისის ღამეს უკრაინული უპილოტო საფრენი აპარატების სამიზნე რუსეთის სიღრმეში მდებარე სტრატეგიული ობიექტები გახდა. ინფორმაციას უკრაინის სპეციალური ოპერაციების ძალები ავრცელებს.

სტრატეგიული დარტყმა კიროვის ოლქში

ერთ-ერთი მთავარი სამიზნე კიროვის ოლქში მდებარე „ლაზარევოს“ საწარმოო-სადისპეტჩერო სადგური იყო. ობიექტი უკრაინის საზღვრიდან დაახლოებით 1200 კილომეტრის მოშორებით მდებარეობს.

სადგური „ლაზარევო“ ნავთობსადენ „სურგუტი–პოლოცკის“ უმნიშვნელოვანესი ნაწილია. სწორედ ამ არტერიით ხდება ციმბირიდან და რუსეთის ჩრდილოეთიდან ნავთობის ტრანსპორტირება ბალტიისპირეთის პორტების — პრიმორსკისა და უსტ-ლუგას მიმართულებით, ასევე ბელარუსისკენ.

კავშირი „დრუჟბასთან“

სამხედრო ანალიტიკოსების ცნობით, ეს სადგური პირდაპირ კავშირშია მაგისტრალურ ნავთობსადენ „დრუჟბასთან“. ეს კვანძი უზრუნველყოფს ნავთობის გადატუმბვას რუსეთის ევროპული ნაწილის ორ უმსხვილეს მილსადენს შორის, რაც მის სტრატეგიულ მნიშვნელობას კიდევ უფრო ზრდის.

დაზიანებები როსტოვის ოლქში

პარალელურად, უკრაინულმა დრონებმა როსტოვის ოლქის დასახლება მატვეევ-კურგანში მდებარე ნავთობბაზა „აგროპროდუქტს“ დაარტყეს. ობიექტი აღჭურვილია დიდი მოცულობის რეზერვუარებითა და სატუმბი სადგურებით.

„აგროპროდუქტი“ ასევე ფლობს სარკინიგზო და საავტომობილო ჩამოსასხმელ ტერმინალებს, რაც მას ნავთობპროდუქტების განაწილების მნიშვნელოვან კერად აქცევს. უკრაინული მხარის განცხადებით, მსგავსი თავდასხმები პირდაპირ აზიანებს რუსეთის ეკონომიკურ შესაძლებლობებს და ომის წარმოების რესურსს ამცირებს.