აშშ-ის შეიარაღებული ძალების ცენტრალურმა სარდლობამ (CENTCOM) დაადასტურა, რომ ამერიკულმა არმიამ ირანის ტერიტორიაზე სამხედრო სამიზნეების წინააღმდეგ მასშტაბური ოპერაცია დაიწყო. დარტყმები უმაღლესი მთავარსარდლის, პრეზიდენტ დონალდ ტრამპის პირდაპირი ბრძანებით განხორციელდა.

CENTCOM-ის ოფიციალურ განცხადებაში ნათქვამია, რომ აღნიშნული ქმედება ირანის მხრიდან „დაუსაბუთებელი და განგრძობითი აგრესიის“ საპასუხო ნაბიჯია. ვაშინგტონის განმარტებით, ოპერაცია თავდაცვით ხასიათს ატარებს.

ამერიკელი მაღალჩინოსნების თქმით, სამხედრო ოპერაციის მთავარი მიზანი თეირანის იძულებაა, რათა ირანმა სამშვიდობო შეთანხმებას ხელი მოაწეროს. ოპერაციამდე ცოტა ხნით ადრე, პრეზიდენტმა ტრამპმა ოვალურ კაბინეტში ჟურნალისტებთან საუბრისას მკაცრი განცხადება გააკეთა: „ჩვენ მათ დავარტყამთ, ძალიან ძლიერად დავარტყამთ“.

3 ფოტო — დააჭირე გასადიდებლად

თავის მხრივ, ირანული მხარე მომხდარს აგრესიად აფასებს. ირანულმა მედიამ, სამხედრო წყაროზე დაყრდნობით, უკვე გაავრცელა ინფორმაცია, რომ თეირანი ნებისმიერ მსგავს ქმედებას „ძლიერი პასუხით“ უპასუხებს.

ამჟამად რეგიონში ვითარება უკიდურესად დაძაბულია. საერთაშორისო დამკვირვებლები აკვირდებიან, თუ როგორ განვითარდება მოვლენები და რა ფორმას მიიღებს ირანის საპასუხო ქმედება.