ჰორმუზის სრუტეში, რომელიც მსოფლიო ენერგეტიკული უსაფრთხოებისთვის ერთ-ერთ ყველაზე კრიტიკულ წერტილს წარმოადგენს, კვლავ დაძაბული ვითარებაა. აშშ-ის ცენტრალური სარდლობის ოფიციალური განცხადებით, ამერიკელმა სამხედროებმა ირანული წარმოების ორი დამრტყმელი, ე.წ. „კამიკაძე“ დრონი ჩამოაგდეს.

სარდლობის ინფორმაციით, უპილოტო საფრენი აპარატები საფრთხეს უქმნიდნენ საერთაშორისო საზღვაო მიმოსვლას. აღნიშნული ზომები მიმართულია რეგიონში ნაოსნობის უსაფრთხოების უზრუნველყოფისკენ.

3 ფოტო — დააჭირე გასადიდებლად

„ამერიკული ძალები კვლავ სრულ საბრძოლო მზადყოფნაში რჩებიან. ჩვენ მზად ვართ, გავაგრძელოთ თავდაცვა ირანის აგრესიული ქმედებების წინააღმდეგ“, — ნათქვამია სამხედრო უწყების განცხადებაში.

აღსანიშნავია, რომ ეს ინციდენტი იზოლირებული შემთხვევა არ არის. მანამდე, ამავე რეგიონში, აშშ-ის სამხედრო ძალებმა ოთხი ირანული დრონი გაანადგურეს. საპასუხოდ, ამერიკულმა მხარემ ირანის სანაპირო სადამკვირვებლო რადარების პოზიციებზე დარტყმები განახორციელა.

ჰორმუზის სრუტე ირანისა და ომანის შორის მდებარეობს და მსოფლიო ნავთობის ტრანსპორტირების უმნიშვნელოვანესი არტერიაა. ნებისმიერი სახის ესკალაცია ამ ტერიტორიაზე პირდაპირ აისახება გლობალურ ბაზრებზე.