აშშ-ის ცენტრალურმა სარდლობამ (CENTCOM) დაადასტურა, რომ ჰორმუზის სრუტის მიმართულებით გაშვებული ოთხი ირანული კამიკაძე-დრონი ამერიკელმა სამხედროებმა ჩამოაგდეს. აღნიშნული ზომა რეგიონში საზღვაო ნავიგაციის უსაფრთხოების დაცვის მიზნით განხორციელდა.

საპასუხო მოქმედებების ფარგლებში, აშშ-ის ძალებმა ირანის სანაპირო რადიოლოკაციურ ობიექტებზე მიიტანეს იერიში. დარტყმები განხორციელდა ქალაქ გორუკსა და კეშმის კუნძულზე განთავსებულ რადარებზე. ამერიკული მხარის განცხადებით, ეს ქმედება მომავალი თავდასხმების პრევენციას ისახავდა მიზნად.

სარდლობის ცნობით, ამერიკული სამხედრო შენაერთები რეგიონში სრულ მზადყოფნაში რჩებიან. ისინი მზად არიან, ნებისმიერ „არაპროვოცირებულ აგრესიას“ თავდაცვის მიზნით უპასუხონ.

მოლაპარაკებების ჩიხი

ინციდენტი აშშ-სა და ირანს შორის მიმდინარე დაძაბული მოლაპარაკებების ფონზე მოხდა. მხარეები ცდილობენ კონფლიქტის დასრულებას, თუმცა პროცესი პრაქტიკულად ჩიხშია შესული.

3 ფოტო — დააჭირე გასადიდებლად

ამერიკული მედიის ინფორმაციით, გასულ უქმეებზე შეთანხმების მიღწევის მცდელობა უშედეგო აღმოჩნდა. უთანხმოება რამდენიმე საკვანძო საკითხს უკავშირდება:

  • ურანის გამდიდრების ვადები: დონალდ ტრამპი 60-დღიან ვადას მოითხოვს, თეირანი კი 90 დღემდე გაზრდას ითხოვს.
  • ფინანსური აქტივები: მხარეები ვერ თანხმდებიან გაყინული მილიარდობით დოლარის განბლოკვის პირობებზე.

აშშ-ის პოზიცია მკაფიოა: თანხების გათავისუფლება მხოლოდ კონკრეტული ნაბიჯების გადადგმის შემდეგ მოხდება. თეირანი კი თანხების ნაწილის დაუყოვნებლივ დაბრუნებას ითხოვს.

ამჟამად აშშ ირანის საზღვაო ბლოკადას აგრძელებს. თავის მხრივ, თეირანი კვლავ აფერხებს თავისუფალ ნაოსნობას სრუტეში, რომელიც მსოფლიო ენერგორესურსების მიწოდების ერთ-ერთი მთავარი არტერიაა.