უკრაინასა და რუსეთს შორის ახალი სამშვიდობო მოლაპარაკებები, შესაძლოა, მიმდინარე ზაფხულს დაიწყოს. გერმანიის საგარეო საქმეთა მინისტრის, იოჰან ვადეფულის შეფასებით, კრემლის პოზიცია იცვლება და რუსეთის პრეზიდენტი ვლადიმირ პუტინი დიპლომატიური პროცესის მიმართ უფრო ღია ხდება.

ვადეფულის თქმით, არსებობს რეალური შანსი, რომ უახლოეს თვეებში მოლაპარაკებების პროცესი დაიწყოს. მისივე განცხადებით, პუტინი შესაძლოა იმ ეტაპზე იყოს, როდესაც კონფლიქტის დიპლომატიური გზით დარეგულირების საკითხზე სერიოზულად მსჯელობს.

ამ ეტაპზე ფრონტის ხაზზე არცერთ მხარეს არ აქვს გადამწყვეტი სამხედრო უპირატესობა. მინისტრმა ხაზგასმით აღნიშნა, რომ ომი ყოველდღიურად მხოლოდ ადამიანურ მსხვერპლს ზრდის, რაც დამატებითი არგუმენტია მოლაპარაკებების დაწყებისთვის.

საინტერესო დეტალია ბელარუსის პრეზიდენტის, ალექსანდრ ლუკაშენკას განცხადება, რომელმაც აღიარა, რომ ომის სამხედრო გზით დასრულება არცერთ მხარეს არ შეუძლია. ვადეფულმა ამას უწოდა „საინტერესო სიგნალი“, რომელიც პუტინის უახლოესი მოკავშირისგან მოდის.

გერმანელი დიპლომატი დარწმუნებულია, რომ უკრაინა მოლაპარაკებებისთვის მზად არის და ახლა გადაწყვეტილება რუსეთზეა დამოკიდებული. მან მკაფიოდ განაცხადა, რომ უკრაინის მხარდაჭერა საერთაშორისო პარტნიორების მხრიდან არ შესუსტდება.

3 ფოტო — დააჭირე გასადიდებლად

„პუტინმა უნდა გააცნობიეროს, რომ ომის გაგრძელებას აზრი არ აქვს. სანქციები რუსეთის ეკონომიკას მძიმე დარტყმას აყენებს და გონივრული შეფასებით, ახლა საუკეთესო მომენტია კონფლიქტის დასასრულებლად,“ — განაცხადა ვადეფულმა.

მიუხედავად იმისა, რომ კრემლის პოზიციის ცვლილებასთან დაკავშირებით ვადეფული ფრთხილ ოპტიმიზმს გამოხატავს, ის ხაზს უსვამს, რომ წნეხი რუსეთზე გაგრძელდება. მსოფლიო თანამეგობრობის მთავარი მიზანი ომის შეწყვეტა და დიპლომატიური მექანიზმების ამოქმედებაა.