უკრაინის პრეზიდენტმა ვოლოდიმირ ზელენსკიმ აშშ-ის პრეზიდენტ დონალდ ტრამპთან გამართული სატელეფონო საუბრის დეტალები გაასაჯაროვა. 14 ივნისს შემდგარ დიალოგში მხარეებმა უკრაინაში მიმდინარე ომის გამომწვევ მიზეზებსა და სამომავლო პარტნიორობაზე ისაუბრეს.

ზელენსკის თქმით, ტრამპმა მკაფიოდ აღნიშნა, რომ რუსეთის მიერ ყირიმის ოკუპაცია იყო ის გარდამტეხი მომენტი, რომელმაც დღევანდელი მასშტაბური კონფლიქტი განაპირობა. უკრაინის პრეზიდენტმა ხაზი გაუსვა, რომ იმ პერიოდში საერთაშორისო ასპარეზზე „ძლიერი ლიდერობის“ დეფიციტი რომ არ ყოფილიყო, რუსული აგრესია თავიდან იქნებოდა აცილებული.

„ყველაფერი სწორედ რუსეთის მიერ ყირიმის ოკუპაციით დაიწყო და იმ დროს ძლიერი ლიდერობა რომ ყოფილიყო, ეს ომი საერთოდ არ იქნებოდა“, - განაცხადა ზელენსკიმ ვიდეომიმართვისას.
3 ფოტო — დააჭირე გასადიდებლად

უკრაინის პრეზიდენტმა მადლობა გადაუხადა ამერიკულ მხარეს გაწეული დახმარებისთვის და აღნიშნა, რომ უკრაინელი ხალხი აფასებს აშშ-ის საზოგადოების მხარდაჭერას რუსული აგრესიის წინააღმდეგ ბრძოლაში. ზელენსკის განცხადებით, კიევის მთავარი მიზანი ღირსეული მშვიდობის მიღწევაა, რასაც პარტნიორებთან ერთობლივი ძალისხმევით გეგმავენ.

მხარეები შეთანხმდნენ, რომ დიალოგს „დიდი შვიდეულის“ (G7) სამიტის ფარგლებში გააგრძელებენ, სადაც კვლავ განიხილავენ უსაფრთხოების საკითხებსა და შემდგომი დახმარების გზებს.