უკრაინის პრეზიდენტმა ვოლოდიმირ ზელენსკიმ Sky News-თან ინტერვიუში მკაფიოდ განაცხადა, რომ უკრაინა რუსეთის ფედერაციის სიღრმეში სამხედრო ოპერაციებსა და დარტყმებს გააძლიერებს. მისი თქმით, ეს არის პასუხი რუსულ აგრესიაზე, რომელიც ქვეყნის თავდაცვის ახალ ეტაპს ნიშნავს.

ზელენსკის განცხადებით, ბოლო დღეების მოვლენებმა დაამტკიცა, რომ უკრაინულ უპილოტო საფრენ აპარატებსა და სხვა ტიპის შორ მანძილზე მოქმედ შეიარაღებას შეუძლია რუსეთის მსხვილ ურბანულ ცენტრებამდე მიღწევა. პრეზიდენტმა კონკრეტულ მაგალითად სანკტ-პეტერბურგი დაასახელა, სადაც მნიშვნელოვანი ეკონომიკური ფორუმის მიმდინარეობის პარალელურად, უკრაინული დრონების აქტივობა დაფიქსირდა.

„ჩვენ უბრალოდ ჩუმად არ მოვკვდებით. ჩვენ ვუპასუხებთ. ყოველდღე უფრო ძლიერები გავხდებით“, – განაცხადა უკრაინის ლიდერმა.
3 ფოტო — დააჭირე გასადიდებლად

პრეზიდენტის თქმით, უკრაინამ შეძლო საკუთარი რაკეტებისა და უპილოტო აპარატების წარმოების პროცესის აწყობა და განვითარება, რაც ქვეყნის თავდაცვით შესაძლებლობებს რადიკალურად ზრდის. ზელენსკის შეფასებით, ვლადიმირ პუტინი მხოლოდ მაშინ იწყებს საერთაშორისო პარტნიორებისა და უკრაინის პოზიციების მოსმენას, როდესაც მასზე ძლიერი და ყოვლისმომცველი ზეწოლა ხორციელდება.

გარდა ამისა, ზელენსკიმ ხაზგასმით აღნიშნა, რომ უკრაინის პასუხი რუსულ აგრესიაზე აღარ შემოიფარგლება მხოლოდ ფრონტის ხაზით ან სასაზღვრო რაიონებით. მისი მტკიცებით, უკრაინული ტექნოლოგიური შესაძლებლობები იძლევა იმის საშუალებას, რომ ომი რუსეთის დიდ ქალაქებსა და სტრატეგიულ ცენტრებში გადავიდეს.

„უკრაინულმა დრონებმა უკვე აჩვენეს, რომ მათ შეუძლიათ მიაღწიონ რუსეთის დიდ ქალაქებსა და მნიშვნელოვან ურბანულ ცენტრებს. ჩვენ ამ ომს მათივე ტერიტორიაზე დავაბრუნებთ“, – დასძინა ზელენსკიმ.