გამოცემა „პუბლიკას“ დამფუძნებელი ზურაბ ვარდიაშვილი სომხეთში საკუთარი პირველი ვიზიტის შთაბეჭდილებებს სოციალურ ქსელში აქვეყნებს. ჟურნალისტის თქმით, მასზე დიდი შთაბეჭდილება მოახდინა ადგილობრივების დამოკიდებულებამ და იმ სიახლოვემ, რომელიც ორ ხალხს შორის არსებობს.

ვარდიაშვილი ყვება კურიოზულ შემთხვევას, რომელიც საზღვრის კვეთისას გადახდა. მისი თქმით, მესაზღვრემ მანქანაში ირაკლის დარჩენილი სათამაშო ავტომატი შენიშნა, რამაც თავდაპირველად დაძაბულობა გამოიწვია. თუმცა, მას შემდეგ, რაც მესაზღვრემ სათამაშო იარაღი ხელში აიღო, სიტუაცია მყისიერად შეიცვალა.

„სახე შეეცვალა, მაგრამ როგორც კი მიხვდა, რომ სათამაშო იყო, ისე იხარხარა, მეც ვეღარ შევიკავე თავი. ორი წუთი ერთად ვიცინოდით, მხრებზე ხელების ტყაპუნით“, – იხსენებს ვარდიაშვილი. ჟურნალისტმა იქვე აღნიშნა, რომ ასეთი გულღიაობა და იუმორის გრძნობა მისთვის მნიშვნელოვანი აღმოჩენა იყო.

მისივე თქმით, სომეხი პოლიციელებიც კი განსაკუთრებული კეთილგანწყობით გამოირჩევიან სტუმრების მიმართ. ვარდიაშვილი ამბობს, რომ სომხეთი და საქართველო მენტალურად ბევრ რამეში ჰგვანან ერთმანეთს, მათ შორის – მოლხენისა და სტუმარ-მასპინძლობის ტრადიციებშიც.

2 ფოტო — დააჭირე გასადიდებლად

„სომხებზე უახლოესი ხალხი ჩვენ არ გვყავს“, – წერს ჟურნალისტი და დასძენს, რომ ვიზიტის მიზანი სამუშაო პროცესებია, თუმცა იმედოვნებს, რომ დღის ბოლოს კარგად მოლხენის საბაბიც მიეცემათ. ვარდიაშვილის თქმით, ის მოხარულია, რომ ეს შეხვედრა შედგა და სომხეთში პირველმა ვიზიტმა ასეთი დადებითი ემოციები დაუტოვა.