2026 წლის მსოფლიო ჩემპიონატის პირველივე ტურში საფრანგეთის ნაკრებმა სენეგალის წინააღმდეგ კლასი აჩვენა და მეტოქე 3:1 დაამარცხა. შეხვედრის მთავარი გმირი კილიან მბაპე გახდა, რომელმაც ორჯერ შეძლო სენეგალელთა კარის აღება.

ისტორიული მიღწევები

მატჩის შემდეგ Opta-ს სტატისტიკურმა მონაცემებმა კიდევ ერთხელ დაადასტურა მბაპეს გამორჩეული სტატუსი. ფრანგმა თავდამსხმელმა 57-ე გოლი გაიტანა ეროვნულ გუნდში და ოლივიე ჟირუს გაუთანაბრდა საფრანგეთის ყველა დროის საუკეთესო ბომბარდირთა სიაში.

გარდა ამისა, მბაპემ მსოფლიო ჩემპიონატების ისტორიაში საკუთარი გოლების რაოდენობა 13-მდე გაზარდა. ამ მაჩვენებლით ის ლეგენდარულ ჟიუსტ ფონტენს გაუთანაბრდა და საფრანგეთის ნაკრების საუკეთესო მეგოლედ იქცა მუნდიალებზე.

მატჩის დეტალები და სტატისტიკა

სენეგალის მხრიდან ერთადერთი საპასუხო გოლი 18 წლის მბაიეს ანგარიშზეა, რომელიც პარი სენ-ჟერმენის საკუთრებაა. საფრანგეთის მესამე გოლი კი ადრიენ რაბიოს პასით ბრედლი ბარკოლამ გაიტანა.

აღსანიშნავია, რომ საფრანგეთმა მატჩის პირველ ტაიმში მხოლოდ ერთი დარტყმა შეასრულა. Opta-ს მონაცემებით, 1966 წლის შემდეგ, ეს გუნდის ყველაზე დაბალი მაჩვენებელია მსოფლიო ჩემპიონატის ჯგუფური ეტაპის მატჩებში.

დიდიე დეშამის სტაბილურობა

დიდიე დეშამისთვის ეს მეოთხე მსოფლიო ჩემპიონატია მთავარი მწვრთნელის რანგში. ის უახლოვდება ჰელმუტ შონის რეკორდს, რომელმაც გერმანიის ნაკრები მუნდიალზე 25 მატჩში უხელმძღვანელა; დეშამის ანგარიშზე კი უკვე 20 შეხვედრაა.

მწვრთნელმა ასევე შეინარჩუნა სტაბილურობა დაცვის ხაზში. სალიბა და უპამეკანო გახდნენ ის წყვილი, რომელმაც ზედიზედ ორ დიდ ტურნირზე (ევრო 2024 და მუნდიალი 2026) დაიწყო თამაში ცენტრალური მცველების პოზიციაზე.

საინტერესო ფაქტია, რომ ორივე გუნდის განაცხადში საფრანგეთში დაბადებული 33 ფეხბურთელი აღმოჩნდა: 23 „ლურჯების“ და 10 „ტერანგას ლომების“ მხარეს.