აშშ-ის მოქალაქეობისა და საიმიგრაციო სამსახურმა (USCIS) ოფიციალურად გამოაცხადა, რომ მწვანე ბარათის მიღების პროცედურა იცვლება. ახალი რეგულაციის მიხედვით, უცხო ქვეყნის მოქალაქეებმა მუდმივი ბინადრობის ნებართვის მისაღებად განაცხადი საკუთარ სამშობლოში მდებარე საკონსულოებში უნდა წარადგინონ.

უწყების განცხადებით, აშშ-ის შიგნით სტატუსის ცვლილება დასაშვები იქნება მხოლოდ „განსაკუთრებულ შემთხვევებში“. ეს ცვლილება მნიშვნელოვნად ართულებს პროცესს იმ პირებისთვის, რომლებიც ამჟამად ამერიკის შეერთებულ შტატებში ლეგალურად, დროებითი ვიზებით იმყოფებიან.

რა იცვლება აპლიკანტებისთვის?

მწვანე ბარათის მიღების მოქმედი სისტემა, რომელიც „სტატუსის კორექტირების“ სახელითაა ცნობილი, ასობით ათას ადამიანს აძლევდა საშუალებას, აშშ-დან გაუსვლელად გაეფორმებინათ მუდმივი საცხოვრებელი. 2024 წელს, ოფიციალური მონაცემებით, დაახლოებით 820 000-მა ადამიანმა სწორედ ამ გზით მიიღო ბინადრობის უფლება.

ახალი პოლიტიკა შეეხება სტუდენტებს, კვალიფიციურ მუშახელს და აშშ-ის მოქალაქეთა მეუღლეებს. იურისტები აფრთხილებენ, რომ ეს გადაწყვეტილება შესაძლოა ოჯახების ხანგრძლივ დაშორებამდე მივიდეს, რადგან საკონსულო სისტემები ახალი ნაკადის გატარებისთვის მზად არ არიან.

ადმინისტრაციის არგუმენტები

საიმიგრაციო სამსახურის პრესსპიკერის, ზაკ კალერის თქმით, ეს ცვლილება „ხარვეზების აღმოფხვრას“ ემსახურება. მისი განცხადებით, როდესაც აპლიკანტები პროცესს საკუთარი ქვეყნიდან გადიან, მცირდება იმ ადამიანების რაოდენობა, რომლებიც უარის მიღების შემდეგ არალეგალურად რჩებიან აშშ-ში.

„ეს პოლიტიკა საშუალებას გვაძლევს, საიმიგრაციო სისტემა კანონის სულისკვეთების შესაბამისად ვმართოთ,“ - აცხადებენ უწყებაში.

გამონაკლისები და გაურკვევლობა

ამ დროისთვის უცნობია, ვინ მოხვდება იმ მცირერიცხოვან ჯგუფში, ვისაც აშშ-ში დარჩენის უფლება მიეცემა. სამსახურის წარმომადგენელმა მიანიშნა, რომ გამონაკლისი შესაძლოა შეეხოთ ლტოლვილებს ან იმ პირებს, რომელთა დარჩენაც „ეკონომიკურ სარგებელს“ მოიტანს ან ქვეყნის ინტერესებში შედის. თუმცა, კონკრეტული კრიტერიუმები, მათ შორის H-1B ვიზის მქონე სპეციალისტებთან დაკავშირებით, ჯერჯერობით არ დაკონკრეტებულა.

იურიდიული წრეები უკვე ემზადებიან შესაძლო საჩივრებისთვის, რადგან ახალი მემორანდუმი ბევრ კითხვის ნიშანს ტოვებს. იურისტები კლიენტებს მოუწოდებენ, დაელოდონ დამატებით ინსტრუქციებს, სანამ რაიმე ნაბიჯს გადადგამენ.