ისრაელის თავდაცვის ძალებმა ღაზა სითის ერთ-ერთ ყველაზე გადატვირთულ საბაზრო უბანში მდებარე საცხოვრებელ კორპუსზე მასშტაბური საჰაერო იერიში მიიტანეს. ისრაელის პრემიერ-მინისტრ ბენიამინ ნეთანიაჰუს ოფისის განცხადებით, ოპერაციის სამიზნე ჰამასის შეიარაღებული ფრთის ახალი მეთაური, მუჰამედ ოდე იყო.

თვითმხილველების თქმით, ალ-ქაიალის შენობის ზედა სამი სართული ერთდროულად ხუთმა რაკეტამ გაანადგურა. თავდასხმა იმ დროს განხორციელდა, როდესაც მოქალაქეები ყურბან-ბაირამის დღესასწაულისთვის ემზადებოდნენ და ქუჩებში დიდი რაოდენობით ხალხი იყო.

ადგილობრივი მედიკოსების ცნობით, თავდასხმის შედეგად დაღუპულია სულ მცირე სამი ადამიანი, ხოლო ათობით დაშავდა. სამაშველო ჯგუფებს ნანგრევებთან მიახლოება გაუჭირდათ, რასაც ხელი შეუშალა არა მხოლოდ შენობის მძიმე დაზიანებებმა, არამედ ტერიტორიის გადატვირთულობამაც.

ვინ არის მუჰამედ ოდე?

ისრაელის ხელისუფლების მტკიცებით, მუჰამედ ოდე 2023 წლის 7 ოქტომბრის ტერორისტული თავდასხმების ერთ-ერთი მთავარი არქიტექტორი იყო. ოფიციალური თელ-ავივი მას პასუხისმგებელს ხდის ისრაელის მოქალაქეებისა და სამხედროების მკვლელობასა და გატაცებაში.

აღსანიშნავია, რომ ოდემ აღნიშნული პოზიცია მას შემდეგ დაიკავა, რაც მისი წინამორბედი, იზ ად-დინ ალ-ჰადადი, მაისის დასაწყისში ანალოგიური საჰაერო იერიშის შედეგად დაიღუპა. ჯერჯერობით არც ისრაელს და არც ჰამასს ოფიციალურად არ დაუდასტურებიათ, მოკლულია თუ არა თავად ოდე ამ კონკრეტულ თავდასხმაში.

ცეცხლის შეწყვეტის რეჟიმი და დაძაბულობა

მიუხედავად იმისა, რომ ოფიციალურად 10 ოქტომბრიდან ცეცხლის შეწყვეტის რეჟიმი მოქმედებს, ისრაელი რეგულარულად ახორციელებს საჰაერო დარტყმებს ღაზას სექტორში. ჰამასი ისრაელს შეთანხმების დარღვევასა და მშვიდობიან მოსახლეობაზე თავდასხმაში ადანაშაულებს.

თავის მხრივ, ისრაელის მთავრობა აცხადებს, რომ მათ აქვთ ლეგიტიმური უფლება, გაანადგურონ ჰამასის წევრები. ისრაელის მტკიცებით, ჰამასმა დაარღვია შეთანხმება, რადგან უარი თქვა განიარაღებაზე და კვლავ აღადგინა საკუთარი საპოლიციო ძალები.

ვითარება რეგიონში კვლავ კრიტიკულია. პარალელურად, ისრაელის პრემიერ-მინისტრმა პირობა დადო, რომ გააძლიერებს სამხედრო მოქმედებებს ლიბანში, სადაც ბოლო თავდასხმებს 11 ადამიანი ემსხვერპლა. საერთაშორისო თანამეგობრობა და გაერო შეშფოთებას გამოთქვამენ ღაზაში დაღუპულთა მზარდი რაოდენობის გამო, რომელიც, ადგილობრივი ჯანდაცვის უწყების მონაცემებით, 72 000-ს აჭარბებს.