მოსკოვის ნაწილი „შავი წვიმის“ ქვეშ აღმოჩნდა — ასე აფასებენ დედაქალაქის მცხოვრებლები იმ მოვლენებს, რომლებიც უკრაინის მხრიდან განხორციელებულ უპრეცედენტო დრონების შეტევას მოჰყვა. ქალაქის სამხრეთ-აღმოსავლეთით მდებარე რაიონებში მოსახლეობა ტანსაცმელზე გაჩენილ უცნაურ შავ ლაქებზე ჩივის.

სამხედრო ექსპერტების შეფასებით, ეს უკრაინის მიერ სრულმასშტაბიანი ომის დაწყების შემდეგ განხორციელებული ყველაზე მძლავრი საჰაერო იერიშია. რუსეთის დედაქალაქის მიმართულებით თითქმის 200-მდე დრონი გაუშვეს.

ადგილობრივი ხელისუფლების მტკიცებით, „ნავთობის წვიმა“ არ ყოფილა, თუმცა მოსკოვის ოფიციალურმა ტელეგრამ-არხმა მოსახლეობას ფანჯრების დახურვისკენ მოუწოდა. განსაკუთრებული რეკომენდაცია მიეცა ბავშვებს, მოხუცებსა და ასთმით დაავადებულებს, რომლებსაც ტერიტორიის სასწრაფოდ დატოვებისკენ მოუწოდეს.

იერიშის შედეგად კაპოტნიას ნავთობგადამამუშავებელ ქარხანაში ძლიერი ხანძარი გაჩნდა. ეს ობიექტი ბოლო ერთ თვეში უკვე მესამედ, ხოლო მიმდინარე კვირაში მეორედ გახდა სამიზნე. გავრცელებულ კადრებში ჩანს, თუ როგორ აფეთქდა ნავთობის საცავის სახურავი, რომელიც ათეულობით მეტრის სიმაღლეზე აიჭრა.

Reuters

სოციალურ ქსელებში გავრცელებულ ვიდეოებში, რომელთა ავთენტურობა BBC-მ დაადასტურა, ჩანს, როგორ ეჯახება დრონი მაღალსართულიან შენობას. აფეთქების შედეგად ნამსხვრევები ეზოში ცვიოდა, ხოლო მიმდებარე სავაჭრო ცენტრს ხანძარი გაუჩნდა. მოსკოვის ოთხივე აეროპორტი დროებით დაიხურა, რამაც 500-ზე მეტი რეისის გაუქმება ან დაგვიანება გამოიწვია.

უკრაინის პრეზიდენტმა ვოლოდიმირ ზელენსკიმ განაცხადა, რომ ეს იერიში კიევზე განხორციელებული რუსული თავდასხმის საპასუხო ნაბიჯია, რომლის დროსაც პეჩერსკის ლავრის მონასტერი დაზიანდა. „ჩვენ არ გვსურს ეს ომი, მაგრამ თუ უკრაინა იწვის, თქვენი მოსკოვიც დაიწვება“, — განაცხადა ზელენსკიმ.

რუსეთის თავდაცვის სამინისტროს მონაცემებით, ბოლო 24 საათში ქვეყნის მასშტაბით თითქმის 1000 დრონი და ოთხი საკრუიზო რაკეტა იქნა ჩამოგდებული. მიუხედავად ამისა, თავდასხმების ინტენსივობა კითხვის ნიშნის ქვეშ აყენებს მოსკოვის საჰაერო თავდაცვის სისტემების ეფექტურობას, რადგან დრონების ნაწილი დედაქალაქის დაცულ პერიმეტრს მაინც არღვევს.