ესპანეთის დედაქალაქი მადრიდი ისტორიულ დღეს შეხვდა. პაპ ლეო XIV-ის ვიზიტის მეორე დღეს, ქალაქის ცენტრალურ ნაწილში, „სიბელესის“ მოედანზე, დაახლოებით 1.2 მილიონი ადამიანი შეიკრიბა. მორწმუნეებმა, მიუხედავად მაღალი ტემპერატურისა, ქუჩები გადაჭედეს და პონტიფიკოსს მხურვალე ოვაციებით შეეგებნენ.

„სიბელესის“ მოედანი, რომელიც ტრადიციულად მადრიდის „რეალის“ ტრიუმფის ადგილია, ამჯერად რელიგიური ერთიანობის სიმბოლოდ იქცა. პაპი სპეციალური „პაპომობილით“ გადაადგილდებოდა, რა დროსაც ხალხი მას ყვავილების ფურცლებითა და შეძახილებით — „გაუმარჯოს პაპს“ — ხვდებოდა.

ქალაქის მერმა პაპ ლეოს მადრიდის სიმბოლური გასაღები გადასცა. პასუხად, ვატიკანის ლიდერმა სტუმრების წიგნში გააკეთა ჩანაწერი, სადაც მადრიდს მოუწოდა, დარჩეს ინკლუზიურ და სტუმართმოყვარე ქალაქად, რომელიც ადამიანურ ღირებულებებზეა აგებული.

ვიზიტი, რომელიც 6 ივნისს დაიწყო და 12 ივნისამდე გაგრძელდება, პაპის პირველი ოფიციალური მოგზაურობაა ევროკავშირის წევრ ქვეყანაში, იტალიის გარეთ. შაბათს პონტიფიკოსი უსახლკაროებსა და მიგრანტებს შეხვდა, ასევე 600 ათას ახალგაზრდასთან ერთად ლოცვაში მიიღო მონაწილეობა.

პაპის გრაფიკი დატვირთულია. მადრიდის შემდეგ ის ბარსელონასა და კანარის კუნძულებზე გაემგზავრება. კანარის კუნძულებზე ვიზიტის მთავარი მიზანი აფრიკიდან ჩამოსულ მიგრანტებთან შეხვედრაა, რომლებმაც სიცოცხლის რისკის ფასად გადაკვეთეს ოკეანე.

„მოხარული ვარ, რომ ის ჩვენთვის, მიგრანტებისთვის ლოცულობს“, — განაცხადა 72 წლის პერუელმა ანდრეა მარგარიტამ, რომელიც ესპანეთში ექვსი თვის წინ ჩავიდა. პაპმა თავის მხრივ აღნიშნა, რომ მისი ვიზიტის მიზანი მსოფლიოსთვის მაგალითის მიცემაა, რათა პატივი სცენ „თითოეულ ადამიანს“ და თავი შეიკავონ საზოგადოების დაყოფისგან.

საჯარო წირვის შემდეგ, პაპი ლეო XIV თავისი ავგუსტინელთა ორდენის წევრებს დახურულ კარს მიღმა შეხვდა, მოგვიანებით კი მადრიდის ცენტრში კულტურის, სპორტისა და შოუბიზნესის წარმომადგენლებთან შეხვედრა გამართა.