პოლონეთში რუსი მხატვარი და ვლადიმერ პუტინის აქტიური კრიტიკოსი, რობერტ კუზოვკოვი, რომელიც ფართო საზოგადოებისთვის „სემიონ სკრეპეცკის“ ფსევდონიმით იყო ცნობილი, მოკლეს. შემთხვევა ორშაბათს დილით, ბელარუსის საზღვართან ახლოს მდებარე ქალაქ ბიალო-პოდლასკაში მოხდა.

ლუბლინის საოლქო პროკურატურის ინფორმაციით, 44 წლის მხატვარს ქალაქის ერთ-ერთ ავტოსადგომზე თავს დაესხნენ. მკვლელმა მას ჯერ ორი ტყვია ესროლა, ხოლო მას შემდეგ, რაც მსხვერპლი მიწაზე დაეცა, კიდევ სამი გასროლა განახორციელა. კუზოვკოვი ადგილზევე გარდაიცვალა.

დაგეგმილი მკვლელობა?

ინციდენტი ბელარუსის საკონსულოდან სულ რაღაც 600 მეტრის დაშორებით მოხდა. სამართალდამცავებმა შემთხვევის ადგილიდან ამოიღეს ხუთი მასრა და „Geco 9mm Luger“-ის ტიპის ტყვია. პროკურორ მარჩინ კოზაკის განცხადებით, პოლიციამ მომხდართან კავშირის ეჭვით უკვე დააკავა ბელარუსის ორი მოქალაქე, 33 და 37 წლის მამაკაცები. ამჟამად მიმდინარეობს მათი როლის დადგენა აღნიშნულ დანაშაულში.

რობერტ კუზოვკოვი პოლონეთში 2021 წელს გადავიდა. ის ცნობილი იყო პოლიტიკური კარიკატურებით, სადაც ხშირად დასცინოდა რუსეთის პრეზიდენტ ვლადიმერ პუტინს, ბელარუსის ლიდერ ალექსანდრ ლუკაშენკოსა და ჩეჩნეთის ლიდერ რამზან კადიროვს.

ბოლო საჯარო აქტივობა

მხატვრის ბოლო საჯარო გამოჩენა 12 ივნისს, ბერლინში, რუსეთის საელჩოსთან გამართულ საპროტესტო აქციაზე დაფიქსირდა. სოციალურ ქსელებში გავრცელებულ ვიდეოებში ჩანს, რომ კუზოვკოვი თან ატარებდა კარიკატურას, რომელზეც პუტინი და სტალინი იყვნენ გამოსახულნი. მას ასევე შარვალზე ჰქონდა მიბმული რუსეთის დროშა, რომელიც ქუჩაში მიათრევდა.

პროკურატურის თქმით, კუზოვკოვის შემოქმედება პირდაპირ იყო მიმართული რუსეთის ფედერაციის ხელისუფლების პოლიტიკის წინააღმდეგ. სამართალდამცავები აგრძელებენ საგამოძიებო მოქმედებებს, ოთხშაბათისთვის კი დაგეგმილია ცხედრის სასამართლო-სამედიცინო ექსპერტიზა.