რუსეთის მიერ უკრაინის ქალაქებზე მიტანილმა მასირებულმა სარაკეტო და დრონების იერიშებმა სულ მცირე ცხრა ადამიანის სიცოცხლე იმსხვერპლა. თავდასხმების შედეგად დაზიანდა მნიშვნელოვანი ისტორიული და რელიგიური ძეგლი კიევში.

უკრაინელი ოფიციალური პირების ინფორმაციით, კიევზე მიტანილ დარტყმებს ოთხი ადამიანის სიცოცხლე შეეწირა. ამავდროულად, ხარკოვში, სადაც რუსულმა ძალებმა ცეცხლი გახსნეს, ხანძრის ჩაქრობის დროს ხუთი მეხანძრე-მაშველი დაიღუპა.

იერიშის შედეგად მნიშვნელოვნად დაზიანდა კიევ-პეჩერსკის ლავრის ტერიტორიაზე მდებარე მე-11 საუკუნის მიძინების საკათედრო ტაძარი. უკრაინის პრემიერ-მინისტრმა იულია სვირიდენკომ მომხდარს „სასტიკი თავდასხმა ჩვენს ხალხსა და მემკვიდრეობაზე“ უწოდა.

უკრაინის საგარეო საქმეთა მინისტრმა ანდრიი სიბიჰამ განაცხადა, რომ ოფიციალური კიევი იუნესკოსა და სხვა საერთაშორისო მექანიზმების ჩართვას მოითხოვს, რათა დაუყოვნებლივ მოხდეს რეაგირება რუსეთის მხრიდან „სახელმწიფო ბარბაროსობაზე“.

კიევის მერმა ვიტალი კლიჩკომ დაადასტურა, რომ სარაკეტო და დრონების შეტევებმა გაანადგურა საცხოვრებელი კორპუსები და ავტომობილები. დედაქალაქის მასშტაბით 140 000-ზე მეტი აბონენტი ელექტროენერგიის გარეშე დარჩა. ორშაბათს უკრაინის უმეტეს ნაწილში საჰაერო განგაში იყო გამოცხადებული.

პოლონეთმა, როგორც უკრაინის მეზობელმა სახელმწიფომ, პრევენციული ზომების ფარგლებში ჰაერში საკუთარი გამანადგურებლები აამაღლა და სახმელეთო საჰაერო თავდაცვის სისტემები სრულ მზადყოფნაში მოიყვანა.

პარალელურად, რუსეთის ქალაქ ტულაში, მოსკოვის სამხრეთით, უკრაინული დრონების თავდასხმის შედეგად დაიღუპა სამი და დაშავდა ასევე სამი ადამიანი, მათ შორის ერთი წლის ბავშვი.

Reuters

ეს მოვლენები საფრანგეთში დაგეგმილი G7-ის სამიტის წინ განვითარდა, სადაც უკრაინის ომი ერთ-ერთი მთავარი განსახილველი საკითხია. უკრაინის პრეზიდენტმა ვოლოდიმირ ზელენსკიმ განაცხადა, რომ მან აშშ-ის პრეზიდენტ დონალდ ტრამპთან უკვე გამართა საუბარი კონფლიქტის დასრულების გზებზე.