თალიბანის მმართველობის ქვეშ მყოფ ავღანეთში არასრულწლოვანთა ქორწინება პირველად გახდა ოფიციალურად აღიარებული. უფლებადამცველების განცხადებით, გასულ კვირას მიღებული ახალი კანონი ქალებსა და მოზარდ გოგონებს ქმრების თანხმობის გარეშე განქორწინების შესაძლებლობას უსპობს.

ქვეყანაში არასრულწლოვანთა ქორწინების ოფიციალური სტატისტიკა არ არსებობს, თუმცა აქტივისტები აცხადებენ, რომ ეს მაჩვენებელი საგანგაშოდ გაიზარდა მას შემდეგ, რაც თალიბანმა გოგონებს 11 წლის ასაკის ზემოთ განათლების მიღება აუკრძალა. არაოფიციალური მონაცემებით, ბოლო პერიოდში ქორწინებაში იძულებული გოგონების 70% სწორედ განათლების სისტემიდან გარიყვის შედეგად აღმოჩნდა მსგავს მდგომარეობაში.

სისტემური ძალადობა კანონის სახელით

ახალი რეგულაცია ქალებს იმ შემთხვევაშიც კი არ აძლევს განქორწინების უფლებას, თუ ისინი ამტკიცებენ, რომ ქორწინება იძულებითი იყო. კანონი ასევე კრძალავს განქორწინებას მეუღლის არყოფნის ან ფინანსური მხარდაჭერის არარსებობის საფუძველზე.

„ნაცვლად იმისა, რომ თალიბანმა უსაფრთხოება და სამართლიანობა უზრუნველყოს, დაკავებულია ქალთა უფლებების შემლახველი და სამარცხვინო დეკრეტების გამოცემით“, — აცხადებს უფლებადამცველი ფატიმა.

ქაბულში უკვე გაიმართა საპროტესტო აქციები, სადაც ქალთა მოძრაობებმა კანონს „სისტემური ძალადობა“ უწოდეს. გაეროს მისიამ ავღანეთში (UNAMA) აღნიშნული ნაბიჯი გოგონების უფლებების ეროზიად და დისკრიმინაციულ პრაქტიკად შეაფასა.

ტრაგიკული რეალობა

ავღანეთის ადამიანის უფლებათა ცენტრის კვლევების თანახმად, ბავშვთა ქორწინების მსხვერპლი გოგონები ხშირად ხდებიან ოჯახური ძალადობისა და მძიმე ფსიქოლოგიური ტრავმების ობიექტები. ცოტა ხნის წინ, დაიკუნდის პროვინციაში 15 წლის გოგონა ოჯახური ძალადობის შედეგად გარდაიცვალა.

თალიბანის სპიკერმა კრიტიკა უარყო და განაცხადა, რომ პროტესტი მხოლოდ იმ ადამიანებისგან მოდის, „ვისაც ისლამთან და რელიგიურ საფუძვლებთან პრობლემები აქვს“. თუმცა, უფლებადამცველები აფრთხილებენ, რომ ეს მიდგომა ქალებს სრულად უსპობს ავტონომიასა და სამართლიანობაზე წვდომას.