სომხეთის ცენტრალურმა საარჩევნო კომისიამ ქვეყნის ყოფილი პრეზიდენტის, რობერტ ქოჩარიანის წინააღმდეგ სისხლის სამართლებრივი დევნის დაწყების ნებართვა გასცა. ქოჩარიანის გარდა, კომისიამ აღნიშნული გადაწყვეტილება მიიღო მისი ოპოზიციური ალიანსის, „სომხეთის“ წევრებისა და ბლოკ „ძლიერი სომხეთის“ წარმომადგენლების მიმართაც.

ყოფილი პრეზიდენტი უფლებამოსილების ბოროტად გამოყენებასა და ფულის გათეთრებაშია ეჭვმიტანილი. საქმე ეხება 2004 წელს განხორციელებულ მიწის იჯარის გარიგებას. ქოჩარიანის ადვოკატის, არამ ორბელიანის განმარტებით, დავა უკავშირდება ჩოგბურთის კორტ „მასტერკლასს“, რომლის წილი 2008 წელს ქოჩარიანის შვილმა, სედრაკმა შეისყიდა. დაცვის მხარე ამტკიცებს, რომ გარიგების დროს ოჯახს კავშირი არ ჰქონია.

სამართლებრივი პროცესების პარალელურად, რობერტ ქოჩარიანს ქვეყნის დატოვება აეკრძალა. შეზღუდვა მას აეროპორტში შეატყობინეს, როდესაც ის რუსეთში სამდღიანი ვიზიტით გამგზავრებას გეგმავდა.

სამართლებრივი წნეხის ქვეშ აღმოჩნდა დავიდ კაზინიანიც, რომელიც „ძლიერი სომხეთის“ წევრი და „სომხეთის ელექტროსადენების“ ყოფილი ხელმძღვანელია. მას ამომრჩევლისთვის ქრთამის გადაცემის მომზადებას ედავებიან. ანტიკორუფციულმა კომიტეტმა საქმესთან დაკავშირებული აუდიოჩანაწერიც გაასაჯაროვა, რის შემდეგაც სასამართლომ კაზინიანი ორთვიან პატიმრობაში დატოვა.

ვითარება 7 ივნისს გამართული საპარლამენტო არჩევნების შემდეგ დაიძაბა. ოფიციალური მონაცემებით, პრემიერ-მინისტრ ნიკოლ ფაშინიანის პარტიამ „სამოქალაქო შეთანხმება“ ხმების 49,745% მიიღო, ხოლო ოპოზიციურმა ალიანსებმა „სომხეთი“ და „ძლიერი სომხეთი“ შესაბამისად 9,923% და 23,271% დააგროვეს. ოპოზიცია არჩევნების შედეგებს არ ეთანხმება და ხელისუფლებას დარღვევებში ადანაშაულებს.

პოლიტიკური დაპირისპირება სომხეთში ერევანსა და მოსკოვს შორის ურთიერთობების გაუარესების ფონზე მიმდინარეობს.