Amazon-მა მორიგი საკამათო გადაწყვეტილება მიიღო. ოთხშაბათს კომპანიამ განაცხადა, რომ თავის სავაჭრო აპლიკაციაში, საძიებო მოთხოვნების საპასუხოდ, ხელოვნური ინტელექტის მიერ გენერირებულ პროდუქტების ფოტოებს განათავსებს. ეს ნაბიჯი გულისხმობს, რომ მსოფლიოს უდიდესი ონლაინ მაღაზია რეალური ნივთების ნაცვლად, „გამოგონილ“ ვიზუალებს შესთავაზებს მომხმარებელს.

კომპანიის ოფიციალური პოზიციით, ეს ფუნქცია იმ მომხმარებლებს დაეხმარება, რომლებმაც იციან, რა სურთ, თუმცა ზუსტი ტერმინოლოგია არ გააჩნიათ. მაგალითად, ავეჯის ან ტანსაცმლის სტილის ძიებისას, ალგორითმი ვიზუალურ მინიშნებებს შექმნის.

როდესაც მომხმარებელი საძიებო ველში კონკრეტულ მოთხოვნას შეიყვანს, ავტომატური შევსების წინადადებების ქვემოთ AI-ის მიერ შექმნილი ვარიანტები გამოჩნდება. თუ, მაგალითად, „ლურჯ კუბოკრულ კაბას“ ეძებთ, სისტემა შემოგთავაზებთ სხვადასხვა სტილისა და სიგრძის ვარიაციებს. იდეა იმაში მდგომარეობს, რომ ერთ-ერთზე დაწკაპუნებით მომხმარებელი უფრო ზუსტ შედეგებზე გადავიდეს.

თუმცა, ექსპერტები ამ მიდგომას სკეპტიკურად უყურებენ. მთავარი პრობლემა ისაა, რომ მომხმარებელმა შესაძლოა ეს ფოტოები რეალურ პროდუქტად აღიქვას. შედეგად, როდესაც ძიების შედეგებში მსგავსი ნივთი არ აღმოჩნდება, მყიდველი იმედგაცრუებული დარჩება. გაუგებარია, რატომ უნდა შექმნას კომპანიამ ფეიკ-პროდუქტები მაშინ, როცა მის პლატფორმაზე მილიონობით რეალური ფოტოა განთავსებული.

ეს ფუნქცია Amazon-ის მცდელობების ნაწილია, AI სავაჭრო პროცესში მაქსიმალურად ინტეგრიროს. კომპანიამ უკვე დანერგა ხელოვნური ინტელექტი მომხმარებელთა შეფასებების შეჯამებისთვის, რაც, ბევრის აზრით, საკმაოდ სასარგებლო ინსტრუმენტია. გასულ წელს კი წარადგინეს აუდიო-შემაჯამებლები, სადაც AI პოდკასტის ფორმატში აღწერს პროდუქტის მახასიათებლებს.

Image Credits:Amazon

ამავდროულად, Amazon-ი აქტიურად ავითარებს სხვა ტექნოლოგიებსაც: „შოპინგ-კოლაჟებს“, Amazon Lens Live-ს, რომელიც კამერის საშუალებით ვიზუალურ შესაბამისობებს ეძებს, და ხმოვანი ძიების სისტემას, რომელიც ახლახან Alexa for Shopping-ით ჩანაცვლდა.