ლონდონის ცნობილი ვესტ-ენდის ერთ-ერთი გამორჩეული სივრცე, შაფტსბერის თეატრი (Shaftesbury Theatre), ისტორიულ ცვლილებას გეგმავს. მომავალი წლის თებერვლიდან თეატრი ოფიციალურად დარი ჯუდი დენჩის სახელს ატარებს. გადაწყვეტილება მსახიობის მიერ ბრიტანული თეატრისა და საშემსრულებლო ხელოვნების განვითარებაში შეტანილი განსაკუთრებული წვლილის აღიარებას ისახავს მიზნად.

Getty Images

თეატრის ხელმძღვანელობის განცხადებით, ეს ნაბიჯი დენჩსა და თეატრს შორის არსებულ მრავალწლიან კავშირს უსვამს ხაზს. 80-იან და 90-იან წლებში ჯუდი დენჩი „თეატრი კომედიის“ (Theatre of Comedy) კოლექტივის ერთ-ერთი დამფუძნებელი იყო, რომელიც სწორედ ამ სცენაზე დგამდა სპექტაკლებს. მსახიობი მჭიდროდ თანამშრომლობდა თეატრის მფლობელ ტაფნერების ოჯახთანაც.

„შაფტსბერის თეატრს ჩემს გულში ყოველთვის განსაკუთრებული ადგილი ეკავა. ეს პატივი ჩემთვის ნამდვილად ათასჯერ აღემატება მოლოდინს“, — განაცხადა ჯუდი დენჩმა. მან ხაზი გაუსვა, რომ ცოცხალი თეატრი კვლავაც რჩება ისტორიების მოყოლისა და მაყურებლის გართობის უმნიშვნელოვანეს საშუალებად, რასაც იგი მთელი თავისი კარიერის განმავლობაში ემსახურებოდა.

თეატრის გამგეობის თავმჯდომარემ, დონალდ ტაფნერ უმცროსმა აღნიშნა, რომ მათ „ძალიან თბილი მოგონებები აკავშირებთ ჯუდისთან“. მისი თქმით, ეს გადაწყვეტილება მსახიობის არაორდინალური ნიჭისა და თეატრალური ხელოვნების განვითარებაში შეტანილი წვლილის სათანადო დაფასებაა.

აღსანიშნავია, რომ ეს ისტორიული პრეცედენტია — ვესტ-ენდში აქამდე არცერთი თეატრი არ ყოფილა სახელდებული მსახიობი ქალის პატივსაცემად. თეატრის აღმასრულებელმა დირექტორმა ელეანორ ლენგმა აღნიშნა, რომ ვესტ-ენდის თეატრების სახელდებისას ბრწყინვალე ქალების მიღწევებს ხშირად სათანადოდ არ აფასებენ, ამიტომ მოხარულნი არიან, რომ „მისი სახელი სამუდამოდ ანათებს შენობის თავზე“.

ჯუდი დენჩი, რომლის კარიერაც შვიდ ათწლეულს მოიცავს, თანამედროვეობის ერთ-ერთ ყველაზე დაფასებულ მსახიობად ითვლება. გარდა თეატრალური მოღვაწეობისა, იგი ფართო აუდიტორიისთვის ცნობილია BBC-ის კომედიური სერიალით „As Time Goes By“, რომელიც ტაფნერების საპროდიუსერო კომპანიის მიერ იყო შექმნილი.