გლობალური ციფრული ინფრასტრუქტურა სერიოზული კლიმატური გამოწვევების წინაშეა. First Street-ის ახალი კვლევის თანახმად, მსოფლიოში არსებული მონაცემთა ცენტრების 79% მოწყვლადია ისეთი სტიქიური მოვლენების მიმართ, როგორიცაა ძლიერი წყალდიდობები, ქარიშხლები და ხანძრები.

ეს საფრთხეები არამხოლოდ ფიზიკურ ზიანს აყენებს შენობებს, არამედ ზრდის ოპერაციულ ხარჯებს, იწვევს სისტემების გათიშვას და საგრძნობლად ზრდის დაზღვევის პრემიებს.

კვლევა 97 გლობალურ ბაზარს მოიცავს. ექსპერტების შეფასებით, პრობლემა იმაშია, რომ ინვესტორები და დეველოპერები კვლავ ისტორიულ მონაცემებს ეყრდნობიან. თუმცა, კლიმატი დღეს ისე აღარ იქცევა, როგორც წარსულში, ამიტომ ძველი მოდელები რისკების სრულ სურათს ვერ აჩვენებს.

ქრონიკული სტრესი და ფინანსური ზარალი

გარდა მწვავე კლიმატური მოვლენებისა, მონაცემთა ცენტრების ნახევარზე მეტი ექვემდებარება „ქრონიკულ კლიმატურ სტრესს“. ეს გულისხმობს ექსტრემალურ სიცხესა და გვალვებს, რაც პირდაპირ აისახება ენერგოეფექტურობაზე და აძვირებს გაგრილების სისტემების მუშაობას.

First Street-ის მთავარი ეკონომისტი, ჯერემი პორტერი აცხადებს, რომ მსოფლიო კლიმატის ცვლილების შედეგად ატმოსფეროში ტენიანობის მატებასთან ერთად, ნალექების ინტენსივობაც იზრდება, რასაც ბევრი სამთავრობო მოდელი ჯერ კიდევ ვერ ითვალისწინებს.

გეოგრაფიული განსხვავებები

რისკის მაჩვენებლები რეგიონების მიხედვით მნიშვნელოვნად განსხვავდება:

  • აზია-წყნარი ოკეანის რეგიონი: 89%
  • ამერიკა: 50%
  • ევროპა, ახლო აღმოსავლეთი და აფრიკა: 46%

ყველაზე მაღალი რისკის ქვეშ მყოფ ბაზრებს შორის დასახელებულია ვირჯინია (აშშ), ჯოჰორი (მალაიზია) და მარსელი (საფრანგეთი). ყველაზე უსაფრთხოდ კი ნორდიკული ქვეყნების ბაზრები მიიჩნევა.

ინდუსტრიის პასუხი

ზოგიერთი ოპერატორი უკვე ცდილობს ადაპტირებას. მაგალითად, Digital Realty იყენებს წყლის გარეშე ან ჩაკეტილი ციკლის გამაგრილებელ სისტემებს, რათა შეამციროს დამოკიდებულება გარე რესურსებზე.

თუმცა, ექსპერტები ხაზს უსვამენ, რომ მხოლოდ შენობის გამაგრება საკმარისი არ არის. საჭიროა სისტემური მიდგომა, რომელიც გაითვალისწინებს ინფრასტრუქტურას, ელექტრომომარაგებას და წვდომის გზებს კრიტიკულ სიტუაციებში.