საქართველოში ჩინური ენისა და კულტურის მიმართ ინტერესი აქტიურად იზრდება, რასაც თბილისში გამართული „ჩინური ენის ხიდის“ კონკურსიც ადასტურებს. ღონისძიება თავისუფალი უნივერსიტეტის ბაზაზე არსებულ კონფუცის ინსტიტუტში ჩატარდა.

წელს ფინალურ ეტაპზე 14 ქართველი სტუდენტი მონაწილეობდა. ჟიურიმ გამარჯვებულები სამი რთული ტურის გავლის შემდეგ გამოავლინა.

კონკურსანტებმა უნარები რამდენიმე მიმართულებით აჩვენეს. სტუდენტებმა ჩინურ ენაზე გამოსვლა მოამზადეს, უპასუხეს ჟიურის შეკითხვებს და საკუთარი შემოქმედებითი ნომრებიც წარადგინეს.

ღონისძიებას სტუდენტების ახლობლები და მეგობრები აკვირდებოდნენ. კონკურსის შედეგად პირველი ადგილი თბილისის სახელმწიფო უნივერსიტეტის სტუდენტმა, ლუკა კუროამ დაიკავა.

ლუკა უკვე რამდენიმე წელია, რაც თსუ-ში სინოლოგიას ეუფლება. როგორც გამარჯვებულმა აღნიშნა, მისი სამეცნიერო ინტერესები ჩინეთის ისტორიას, კულტურასა და საერთაშორისო ურთიერთობებს უკავშირდება. ის საქართველოს „ჩინური ენის ხიდის“ 25-ე საერთაშორისო ფინალზე წარადგენს, რომელიც ჩინეთის სახალხო რესპუბლიკაში გაიმართება. გარდა ამისა, სტუდენტს ჩინეთის ერთ-ერთ უმაღლეს სასწავლებელში სტაჟირების გავლაც შეეძლება.

საქართველოში ჩინეთის საელჩოს მრჩეველმა, დაი ჩუნიუნმა კონკურსის მნიშვნელობაზე ისაუბრა და აღნიშნა, რომ ეს ღონისძიება ჩინური ენის შემსწავლელთათვის ერთგვარი ოლიმპიადაა.

„ეს არ არის მხოლოდ ენის ცოდნის შეჯიბრი, არამედ პლატფორმა, რომელიც ხელს უწყობს კულტურულ გაცვლასა და სხვადასხვა ქვეყნის ახალგაზრდებს შორის მეგობრობის განმტკიცებას“, — განაცხადა დაი ჩუნიუნმა.

წლევანდელი კონკურსის მთავარი თემა „ერთი სამყარო, ერთი ოჯახი“ იყო. იდეა მიზნად ისახავს სამყაროს აღქმას, სადაც ადამიანები ჰარმონიასა და თანხმობაში ცხოვრობენ.

თბილისში კონკურსის ორგანიზატორები ჩინეთის საელჩო და კონფუცის ინსტიტუტი იყვნენ. მონაწილეებს სამახსოვრო საჩუქრები გადაეცათ, ხოლო სამ საუკეთესო ადგილზე გასულ სტუდენტს სხვადასხვა პრიზი გადაეცა.